Partııalyqtar Batys Qazaqstan jáne Qyzylorda oblystaryna jolǵa shyqty. Bir kún ishinde 4 shalǵaı eldi meken qamtylyp, qabyldaýǵa 100-den astam azamat keldi, dep habarlaıdy Egemen.kz.
Batys Qazaqstan oblysy Syrym aýdanynyń turǵyndary «AMANAT» partııasynyń respýblıkalyq mobıldi qoǵamdyq qabyldaý bólmesiniń ókilderine sýmen jabdyqtaý, kentishilik, aýdandyq joldardy jóndeý, abattandyrý jáne ózge de ózekti máseleler boıynsha júgindi.
Máselen, Araltóbe aýylynyń turǵyny Gúlnar Kenesarına gazben qamtý máselesin qozǵady.
«Osy aýylda 30 jyl turyp jatyrmyn. Gaz tartyldy. Alaıda bir úıdi kógildir otynǵa qosý úshin 400 myń teńge surap otyr. Al meniń zeınetaqym nebary 50 myń teńge. Kúıeýim ekeýmiz múgedek jandarmyz. Sonda bizge ne iste deısizder? Úıdi tezek jaǵyp jylytyp otyrmyz. Bir arba tezektiń quny 20 myń teńge. Buǵan qosa, jetkizip berý úshin taǵy 3 myń teńge tóleımiz. Sebebi jetkizip beretin traktordyń dızel otyny qymbat turady. Zeınetkerler men múgedekterdiń úıin gazǵa tegin qosyp berýdi suraımyz», deıdi zeınetker.
Sol kúni partııalyqtar Qyzylorda oblysynyń Jalaǵash aýdanynda boldy. Aqqum aýyldyq okrýgi turǵyndarynyń atynan sóılegen zeınetker О́mirtaı Ábjalıev aýyldaǵy aýrýhanany qalpyna keltirip, ǵımaratty jóndeýden ótkizip berýdi surady.
Al Dúr Ońǵar aýylynyń turǵyny Nurserik Bohaev jol jóndeý jáne gazben qamtý máselelerin qozǵady.
«Aýyldyń jol sapasy óte nashar. Qysy-jazy qıynshylyq kóremiz. Taǵy bir ózekti másele – jylytý. Qazir kómir men otynnyń quny asa qymbat. Eger aýylǵa gaz tartylatyn bolsa, turǵyndar sany da artatyn edi. Búgin «AMANAT»-tyń mobıldi brıgadasy ótinish-tilegimizge qulaq túrdi. Partııanyń qoldaýymen jol salynyp, gaz tartylady degen úmittemiz», dedi ol.
Aýyl ákimi Ábımúslim Qoqanovtyń aıtýynsha, kelesi jyly jobalyq-smetalyq qujattama ázirlenedi. Al 2024 jyly eldi mekenge gaz tartylady.
«Naýryzdan beri 800-den astam shalǵaı aýyldyq eldi mekende bolyp, 7 myńnan astam azamatty qabyldadyq. Jalpy, jyl basynan beri «AMANAT» partııasynyń qoǵamdyq qabyldaýyna 100 myńnan astam adam júgindi. Turǵyndardy negizinen áleýmettik qamsyzdandyrý – 29%, turǵyn úı-kommýnaldyq sharýashylyq – 17%, turǵyn úımen qamtamasyz etý jáne jer ýchaskelerin bólý – 10% máseleleri tolǵandyrady», dedi «AMANAT» partııasy Respýblıkalyq qoǵamdyq qabyldaý bólmesi jetekshisiniń orynbasary Azamat Birjanov.