18 qyrkúıekte AQSh-tyń Las-Vegas qalasynda ótetin kásipqoı boks keshinde Gennadıı Golovkınnen bólek, Qazaqstannyń taǵy bir ókili sharshy alańǵa shyǵady. Ol – Álı Ahmedov.
26 jastaǵy Almaty qalasynda týyp-ósken Álı bozbala shaǵynan tanymal bapker Saǵatbek Musahanovtyń qol astynda jattyqty. Áýesqoılar arasynda túrli jarystarǵa qatysyp, jeńis tuǵyryna kóterildi. Eresekter arasynda el birinshiliginiń qola júldegeri, birqatar halyqaralyq týrnırdiń jeńimpazy atandy. Elimizdiń eńbek sińirgen jattyqtyrýshysy Dastan Sádýaqasovtyń jetekshiligimen stýdentter arasynda álem jáne Azııa chempıonattaryna qatysyp, jeńis tuǵyrynyń eń bıik satylaryna kóterildi. 2016 jyly Ahmedov kásipqoı rıngte kúsh synasýǵa bel býdy. Sol aralyqta 18 kezdesý ótkizip, 17-sinde jeńiske jetti. 14 básekeni merziminen buryn aıaqtady. Osydan eki jyl buryn Álıdiń IBF nusqasy boıynsha ekinshi orta salmaqta álem chempıony atanýǵa tamasha múmkindigi boldy. Biraq ol ekvadorlyq Karlos Gangoraǵa ese jiberdi.
Las-Vegasta Álı Ahmedov Gabrıel Rosadomen kúsh synasady. 36 jastaǵy AQSh boksshysy 42 kezdesýdiń 26-synda jeńiske jetip, 15 qarsylasyn esinen tandyrdy. 14 jekpe-jekte jeńilis tapty. Bir báseke teń aıaqtalsa, taǵy bireýiniń nátıjesi esepke alynbady. 2013 jyly Rosado bizdiń Gennadıı Golovkınmen judyryqtasyp, jetinshi raýndta tehnıkalyq nokaýtpen utyldy.