Memleket basshysy Qasym-Jomart Toqaevtyń tapsyrmasymen Parlament Senatynyń Tóraǵasy Máýlen Áshimbaev Ulybrıtanııa jáne Soltústik Irlandııa Qurama Koroldiginiń Patshaıymy II Elızavetany memlekettik jerleý rásimine qatysty, dep habarlaıdy Egemen.kz.
Jerleý rásimi 18-19 qyrkúıek kúnderi London qalasynda ótti.
Senat Spıkeri 18 qyrkúıekte Vestmınster hollynda Patshaıymnyń tabytyn zııarat etý rásimine qatysyp, Qazaqstan Respýblıkasynyń atynan resmı kóńil aıtý kitabyna jazba qaldyrdy. Ol óz jazbasynda II Elızaveta asa kórnekti kóshbasshy jáne brıtan ultynyń birligi men turaqtylyǵynyń sımvoly bolǵanyn, aldaǵy ýaqytta da Patshaıymnyń tektiligi, qadir-qasıeti men jetistikteri álemdegi mıllıondaǵan adamdy jigerlendire beretinin atap ótti.
Sol kúni Máýlen Áshimbaev Býkıngem saraıynda Korol III Charlzdiń Eýropa, Taıaý Shyǵys jáne Azııa elderiniń, úkimetter men halyqaralyq uıymdardyń basshylarynyń jáne koroldik otbasy músheleriniń qurmetine arnalǵan qaraly qabyldaýyna qatysty.
Senat Tóraǵasy Korol III Charlzben suhbat barysynda Prezıdent Qasym-Jomart Toqaevtyń atynan kóńil aıtyp, el Prezıdentiniń sheshimi boıynsha jaqyn arada Astananyń ortalyq saıabaǵyndaǵy gúlzarlardyń birine II Elızaveta Patshaıymnyń esimi beriletinin jetkizdi. Ulybrıtanııa monarhy murager hanzada retinde 1996 jyly Qazaqstanǵa jasaǵan saparyn eske aldy.
Korol Patshaıymnyń qazasyna baılanysty yqylas tanytqan Qazaqstan tarapyna rızashylyǵyn bildirip, qazaqstandyqtarǵa ıgi tilekteri men iltıpatyn jetkizdi.
Qazaqstandyq delegasııa 19 qyrkúıekte Vestmınsterde ótken II Elızaveta Patshaıymdy jerleý rásimine qatysty. Delegasııa quramynda Syrtqy ister mınıstriniń orynbasary Roman Vasılenko da boldy. Rásimge 2000-ǵa jýyq adam qatysty. Olardyń qatarynda koroldik otbasynyń músheleri, memleket jáne úkimet basshylary, dıplomattar men qoǵam ókilderi bar.