Qyrkúıektiń 21-i men 25-i aralyǵynda Reseı Federasııasynyń 16 898 azamaty shekaralyq keden beketteri arqyly Batys Qazaqstan oblysy aýmaǵyna ótti. Bul týraly Batys Qazaqstan oblysy ákimdigi habarlady, dep jazady Egemen.kz.
Reseıdiń bes gýbernııasymen shektesip jatqan Batys Qazaqstan oblysynda 6 shekaralyq keden beketi ornalasqan. Qyrkúıektiń 21-inen bastap osy beketterdiń bárinde de bizdiń elimizge kelýshi reseılikterdiń sany artqan.
Sońǵy statıstıkalyq málimetter boıynsha, Reseı Federasııasynan 21 qyrkúıekte – 186 adam, 22 qyrkúıekte – 532 adam, 23 qyrkúıekte – 362 adam, 24 qyrkúıekte – 410 adam, 25 qyrkúıekte – 302 adam tıisti tirkeýden ótken.
«Qazirgi tańda Batys Qazaqstan oblysy aýmaǵynda Reseı Federasııasynyń 12 265 azamaty tirkelgen. Sonyń ishinde 1307 adam osy qyrkúıek aıynda keldi. О́tken 2021 jyly osy kezeńde 5882 reseılik azamat bolǵan», dep habarlady Batys Qazaqstan polısııa departamentiniń baspasóz qyzmeti.
Elimizge, sonyń ishinde Oral qalasyna kelgen reseılikterdi qarsy alý, ornalastyrý, quqyqtyq jáne turmystyq kómek kórsetý úshin óńirdegi eriktiler iske kirisken. Olar reseılikterdi shekara beketinen Oral qalasyna deıin tasymaldaý, túnemelik oryndar taýyp berý, qazaqstandyq uıaly baılanys kartalaryn qosý, kóshi-qon bólimderine tirkeý t.b. máselelerde qolǵabys berdi. Oral qalasynyń birneshe jerinde kelýshilerge kómek oryndary uıymdastyryldy. Ol jerge túrli sýsyn, ystyq tamaq taratylǵan.
Sońǵy kúnderi Oral qalasynda bir táýlikke jalǵa beriletin páterlerdiń baǵasy 1,5-2 esege kóterilip ketkeni týraly aıtqan edik. Jergilikti turǵyndardyń, kásipkerler men eriktilerdiń kómegimen reseılikter túnep shyǵýy úshin kınoteatrlarda, balalardyń jazǵy demalys lagerlerinde arzan nemese tegin jaılar uıymdastyrylyp jatyr.
«Azamattarǵa arnalǵan úkimet» memlekettik korporasııasynyń Batys Qazaqstan oblysy boıynsha fılıaly Oral qalalyq halyqqa qyzmet kórsetý bólimderine júginýshiler qatary shamadan tys artýyna baılanysty Reseı Federasııasy azamattaryn bólek qabyldaý úshin Oral qalalyq №1 HQO bólimin bekitip qoıdy. Jaǵdaı qalypqa túskenge deıin jergilikti azamattar qujattaryn retteý úshin Oral qalasyndaǵy №2 bólimge keletin boldy.
«Bizdiń «Atameken» balalar men jasóspirimder týrızmi jáne ekologııa ortalyǵy da sońǵy kúnderi Reseıden kelýshi mıgranttardy qabyldaı bastady. Olar prokýratýranyń, kóshi-qon polısııasynyń nazarynda. Qujattarynyń kóshirmesi alynyp, tıisti tirkeýden ótýde. Keshe 70 azamat keldi. Bizde salystyrmaly túrde qoný aqysy arzan, kúnine 2 myń teńge», dedi ortalyq dırektory Aıbolat Qurymbaev.
Árıne, syrttan kelýshilerdiń kúrt kóbeıýine alańdap jatqandar da az emes. Biraq halyqtyń kópshiligi syn sátte adamshylyqtan aınymaı, muqtaj jandarǵa qol ushyn sozaıyq degen pikirde.
Batys Qazaqstan oblysynyń kóshi-qon qyzmeti óńirdegi ahýaldy qatań qadaǵalap, sheteldikterdiń el aýmaǵynda júrýin zańǵa sáıkes baqylaýda ustaıtynyn aıtýda.
«Sońǵy 8 aı ishinde sot sheshimimen 165 sheteldik el aýmaǵynan shyǵaryldy. Sot sheshimin óz erkimen oryndaý úshin sheteldikterge 10 kún mursat beriledi. Alaıda О́zbekstan Respýblıkasynyń 15 azamaty belgilengen ýaqytta Qazaqstan aýmaǵynan shyqpaı, sot sheshimin oryndamaı, jasyrynyp qalmaq bolǵan. Ol azamattar Mańǵystaý oblysy Beıneý aýdanyndaǵy Tájen beketine kúzetpen jetkizilip, shekaradan eriksiz shyǵaryldy. Budan bólek, esh qujatsyz eline orala almaı júrgen 4 О́zbekstan azamatyn da Aqtaý qalasyndaǵy ózbek konsýldyǵyna jetkizip, eline jónelttik. Batys Qazaqstan oblysy aýmaǵynda sheteldik azamattardyń zań men tártip buzbaı júrýi qatań qadaǵalanady», dedi polısııa departamenti.
Batys Qazaqstan