«Qazaqstan temir joly» kompanııasyn tranzıttik-logıstıkalyq korporasııa retinde qaıta qurylymdaý. О́ńirlerdegi joldardyń sapasyn arttyrý. Avtojol qurylysyna erekshe mán berý. Bul mindetter – Memleket basshysy Qasym-Jomart Toqaevtyń «Ádiletti memleket. Birtutas ult. Berekeli qoǵam» Joldaýynda Úkimetke júktegen basty tapsyrmalarynyń birsypyrasy.
Mańyzdy qujatta elimizdiń tranzıttik qýatyn arttyrý máselesine jan-jaqty toqtalǵan Prezıdent: «Qazaqstan qazirgi geosaıası jaǵdaıda Azııa-Eýropa arasyndaǵy asa mańyzdy qurlyq dálizi bolyp otyr. Biz bul múmkindikti tolyq paıdalanyp, álemdik mańyzy bar kólik-tasymal torabyna aınalýymyz kerek. Elimiz osy salada iri jobalardy júzege asyra bastady. Atap aıtqanda, Aqtaýda konteıner haby qurylyp jatyr. Transkaspıı dálizi damyp keledi. Bul jumystarǵa álemdegi úzdik logıstıka kompanııalary tartylady», degen edi. Osy maqsatta Memleket basshysy Úkimetke 2025 jylǵa deıin jergilikti joldardyń keminde 95 paıyzyn jaqsartý jóninde tapsyrma berip, bul máseleni tikeleı baqylaý qajettigin eskertken edi.
Kólik pen logıstıkany damytý máselesi Amanat partııasynyń nazarynan da tys qalǵan emes. Kúni keshe partııa janyndaǵy Kólik jáne logıstıka komıtetiniń otyrysynda elimizdiń tranzıttik qýatyn arttyrý jáne «Qazaqstan temir joly» Ulttyq kompanııasy» AQ-nyń tranzıttik-logıstıkalyq korporasııa bolyp qaıta qurylýy máseleleri keńinen talqylandy.
Otyrysty ashqan komıtet tóraǵasy, Májilis depýtaty Samat Aqyshev Prezıdent Qasym-Jomart Toqaevtyń Qazaqstan halqyna Joldaýy reformalar baǵytynyń sabaqtastyǵyn aıqyndaıtynyna nazar aýdardy. Al ony iske asyrý eldegi jeke bıznestiń damýyna tyń serpin beredi.
«Joldaýda kólik máselesine qatysty aıtylǵan tapsyrmalar qoǵam men jeke bıznesti tarta otyryp oryndalýǵa tıis. Sol arqyly bıznes óz damýyn josparlaı alady. Salaǵa ınvestısııa quıady jáne ortaq jaýapkershilikti arqalaıdy. Memleket basshysy aıtqandaı: «Biz bul múmkindikti tolyq paıdalanyp, álemdik mańyzy bar kólik-tasymal torabyna aınalýymyz kerek», dep atap ótti S.Aqyshev.
Jıynda Indýstrııa jáne ınfraqurylymdyq damý vıse-mınıstri Almaz Ydyrysov komıtet múshelerine Qazaqstannyń tranzıttik qýatyn arttyrý boıynsha qabyldanyp jatqan sharalar týraly baıandady. Ol Transkaspıı halyqaralyq kólik baǵdaryn damytý tranzıttik jáne eksporttyq múmkindikterdi ártaraptandyrýǵa jaǵdaı týǵyzatynyn atap ótti.
«Aldymyzda osy baǵyttyń ótkizý qabiletin 2025 jylǵa qaraı 6 mıllıonnan 10 mıllıon tonnaǵa deıin arttyrý mindeti tur. Atap aıtqanda, Aqtaý portynda álemdik logıstıkalyq kompanııalardy tarta otyryp, «konteınerlik hab» salý josparlanýda. Sondaı-aq Kaspıı teńizindegi parom flotynyń tapshylyǵyna baılanysty, 10 birlik óz paromymyzdyń qurylysyn bastaý josparlanýda. Buǵan qosa jyljymaly temir jol sostavyn jańartý maqsatynda 2025 jylǵa deıin 1500 jartylaı vagon, 3500 vagon platforma jáne 310 lokomotıv satyp alý josparlanyp otyr», – dedi vıse-mınıstr.
О́z kezeginde, «Qazaqstan temir joly» UK» AQ basqarma tóraǵasynyń orynbasary Ánýar Ahmetjanov Eýropa men Azııa elderiniń turaqty saýda kólemi, teńiz tasymalynyń turaqsyzdyǵy men joǵary quny Qazaqstannyń kólik dálizderiniń qýatyn edáýir arttyratynyn atap ótti.
«Keıingi 5 jylda tranzıttiń jyl saıynǵy ósimi orta eseppen 31 paıyzdy qurady. Byltyr rekord ornady. Iаǵnı tranzıt 1 mln JFE-den (konteınerlerden) asty. Bul nátıjege Úkimet pen QTJ-nyń josparly jumysy arqyly qol jetkizildi. Tranzıttik tasymaldardan túsetin kiris retteletin qatynastardaǵy shyǵyndardy jabýdy, jolaýshylar tasymalyn sýbsıdııalaýdy, tarıfterdiń ósýin tejeýdi qamtamasyz etedi», dedi ol.
Bul rette Samat Aqyshev, temir jol tasymaldary naryǵyndaǵy negizgi oıynshy mártebesine qaramastan, salanyń básekege qabiletin arttyrý úshin «Qazaqstan temir joly» kólik jáne logıstıkalyq qyzmetter salasyna jeke kompanııalardy keńinen tartýǵa yqpal etýge tıis dep esepteıdi.
«QTJ bir yńǵaıly mehanızmdi pysyqtaýy qajet. Bul mehanızm QTJ-ǵa aýyrtpashylyq túsiretin mindetterdi oryndaýǵa bıznesti yntalandyrýǵa tıis. Ashyq jáne ádil oıyn erejelerin qalyptastyrý kerek. Túptep kelgende, júk tasymaly tarıfiniń ár adamǵa qatysy bar», dedi komıtet tóraǵasy.
Otyrys qorytyndysy boıynsha, Keńes beıindi ortalyq atqarýshy organ men «Qazaqstan temir joly» ulttyq kompanııa» AQ-ǵa birqatar naqty usynym qabyldady. Atap aıtqanda, Indýstrııa jáne ınfraqurylymdyq damý mınıstrligi Básekelestikti qorǵaý jáne damytý agenttigimen jáne Bas kólik prokýratýrasymen birlesip, bıznesti qorǵaý jáne jeke sektordy qoldaý jóninde tıimdi sharalar qabyldaý qajettigine nazar aýdardy.