«Baqytty otbasyn» qalaı quramyz?

Almatyda Dostyq úıinde «Nur Otan» partııasynyń «Baqytty otbasy» jobasyn júzege asyrý jáne qyzmettestik týraly qol qoıylǵan memorandým aıasynda Respýblıkalyq áıelder odaǵynyń uıymdastyrýymen «Otbasylyq ǵuryp. Joǵary rýhanı-adamgershilik qundylyqtar ústemdiligi» atty dóńgelek ústel ótti. Keleli basqosýǵa elimizdiń qaıratker analary – Respýblıkalyq áıelder keńesiniń músheleri – KSRO halyq ártisi Bıbigúl Tólegenova, Memlekettik syılyqtyń laý­reaty, akademık Álııa Beısenova, Qazaqstan Respýblıkasynyń eńbek sińirgen qaıratkeri Nına Qaıýpova (tóraıym), Qazaqstannyń Eńbek Eri Aıagúl Mırazova, kórnekti ǵalymdar Janar Mustafına, Ajar Jubanova, t.b. qatysyp, Elbasy Joldaýynda kóterilgen qazaqstandyq otbasylardyń ornyqty damýyn ári qaraı jetildirý, ata-ana jaýapkershiligin arttyrý, qazaqy dástúrge jat ajyrasý máselesine, sondaı-aq, ulttyq tárbıe men adamgershilik qundylyqtardy dáripteı otyryp, baqytty otbasyn qurýǵa qatysty oı-pikirlerin ortaǵa salyp, usynystaryn jetkizdi. Partııanyń jańa Doktrınasynda «Otbasy bizdiń qoǵamymyzda dástúrdi saqtaýdyń basty ınstıtýty bolyp sanalady. Qoǵam men memlekettiń beriktigi onyń tutastyǵyna tikeleı baılanysty. Biz qoǵamdaǵy dástúrge negizdelgen otbasy qundylyqtaryn nyǵaıtýdy kózdeı otyryp, ony memleketti kúsheıtýdiń negizgi faktory retinde sanaımyz» delingen. Mine, osy ıdeıany basshylyqqa alǵan dóńgelek ústelge qatysýshylar Otan otbasynan bastalatynyn, onyń qoǵamda qandaı ról atqaratynyn, ulttyq tárbıeniń negizin, ult bolashaǵyn qalyptastyrýda ata-ananyń mindeti jastardy baqytty da berik otbasyn qurýǵa tárbıeleý tóńireginde jaýap izdedi. Oılaryn búkpesiz ortaǵa salyp, qoǵamda oryn alyp otyrǵan keleńsiz máselelerge toqtalyp, alańdaýshylyq bildirdi. Basqosýdyń moderatory Nına Ámirqyzy jobanyń úsh jylǵa arnalǵanyn, Elbasy óziniń bıylǵy Joldaýynda «Otbasy – memlekettiń tiregi» ekenin aıryqsha atap kórsetkenin, elimizdegi memlekettik otbasy saıasaty sabaqtastyǵyn zańnamalyq jaǵynan qamtamasyz etý, otbasyn áleýmettik-ekono­mıkalyq jaǵynan qoldaý, qorǵaýdyń qarastyrylǵanyn, sondyqtan osy máselede «Nur Otanmen» birlese otyryp, qoǵamdyq birlestik qazaqstandyq otbasylardyń baqytty bolýyna óz úlesterin qosatynyn bildirdi. – Qazaqstandyq otbasy tárbıesine tek ata-ana ǵana emes, qoǵam da atsalysýy kerek. Qoǵamdyq birlestik osy joba aıasynda elimizdiń bes oblysynda áleýmettik zertteý júrgizip, qazirgi qazaqstandyq otbasynyń portretin anyqtaý maqsatynda anketa daıyndap, ony partııanyń Ortalyq apparatyna usyndy. Aldaǵy ýaqytta osy zertteý qorytyndysy boıynsha Astanada konferensııa ótkizbekpiz, –dedi Nına Ámirqyzy. Sosıalıstik Eńbek Eri, KSRO halyq ártisi Bıbigúl Tólegenova Qazaqstan qandaı órkenıetti el bolmaıyq, biraq ózimizdiń ulttyq qundylyqtarymyzdy saqtap, «uıada ne kórse, ushqanda sony iledi» degen, neǵurlym balalarymyzǵa erte bastan ulttyq dástúr, ulttyq qasıetterimizdi sińirip ósirsek, sonda ǵana urpaqtar sabaq­tastyǵy jalǵasatynyn tilge tıek etti. Qashanda urpaq tárbıesinde otbasy, ásirese, shańyraqtaǵy er azamat, ákeniń bedel arttyrýda óz oıyn bıik minberlerden aıtyp júrgen QR UǴA-nyń akademıgi Álııa Sársenova, bul joly da osy máseleni kótere kelip, qazirgi balalardy apa-ájeleri emes, Internet, «Aıpad», «Aıfon» tárbıelep jatqanyn, búginde uıyp otyrǵan otbasyn buzatyn qazaq qyzdarynyń kóbeıgenin, al bireýdiń uıyp otyrǵan otbasyn buzý qazaq qyzdaryna jat ekenin, bul shala tárbıeniń jemisi ekenin ashyna aıtty. Álemdik básekege qabiletti sapaly adam kapıtalyn daıyndaýdaǵy úderiste mekteppen birge otbasy da teń dárejeli, teń jaýapkershiliktegi sýbekt bolyp sanalatynyn tilge tıek etken Qazaqstannyń Eńbek Eri Aıagúl Mırazova: «Qazirgi mektep oqýshylary – túgelinen Táýelsizdik perzentteri. Demek, olardyń áke-shesheleri de ata-analardyń jańa býyny. Bizdiń mindetimiz osy jańa býyn ata-ananyń otbasy mádenıetinde bala tárbıesine basymdyq berýge nazaryn aýdarý. Máselen, otbasynyń baqytyn nyǵaıtýda Japonııa men Koreıada qyz bala 18 jasqa kelgende mindetti túrde «Otbasy baqyty» atty kýrsyn oqytady eken. Onda otbasynyń jáne dúnıege keletin bala kútiminiń pedagogıkalyq, psıhologııalyq, medısınalyq, áleýmettik máseleleri, tán jáne jan sulýlyǵy oqytylady, otbasyn saqtaý ustanymy sanaǵa egiledi», deı kele, mundaı tájirıbe otbasynyń turaqtylyǵyn, beriktigin qamtamasyz etýde oń nátıjelerge qol jetkizetinin ekpin túsire aıtty. Jıyn qorytyndysynda dóńgelek ústelde aıtylǵan oı-pikirler jınaqtalyp, segiz usynys qabyldanyp, «Nur Otan» partııasyna joldandy. Gúlzeınep SÁDIRQYZY, «Egemen Qazaqstan».