Muǵaljar aýdanynyń soty men prokýratýrasy zamanaýı jańa ǵımaratqa qonys aýdardy. Elbasy N.Nazarbaev Joldaýynda atap kórsetkenindeı, zań aldyndaǵy teńdik – quqyqtyq tártiptiń shyn mánindegi negizi bolýy tıis. Osy rette quqyq qorǵaý organdaryna, naqtyraq aıtqanda, ádilettilikti júzege asyrýshy sot júıesine, sondaı-aq, qadaǵalaý organy retinde prokýratýraǵa erekshe nazar aýdarylyp otyr. Buǵan dálel – Muǵaljar aýdanynda zańdylyq pen quqyqtyq tártipti qamtamasyz etý jumysynyń sapasyn arttyrýǵa múmkindik beretin aýdandyq sot pen prokýratýranyń biriktirilgen jańa ákimshilik ǵımaratynyń boı kóterýi bolyp tabylady.
Bul úsh qabatty jańa ǵımarat Qandyaǵash qalasynyń sáýletin asha túsýimen birge, jergilikti turǵyndarǵa ózderiniń quqyqtary men bostandyqtaryn qorǵaýǵa qatysty máselelerdi sheshýge qolaıly boldy. Munda kútý zaldary, joǵary tehnologııaly qondyrǵylarmen jabdyqtalǵan sot májilisiniń zaldary, sot qyzmetkerlerine arnalǵan jeke bólmeler, sondaı-aq, muraǵat jáne kodıfıkasııa oryndary qarastyrylǵan. Jalpy aıtqanda, sot tóreligin júzege asyrý úshin sýdıalar men sot qyzmetkerlerine qajetti barlyq jaǵdaılar jasalǵan.
Jańa ǵımarattyń saltanatty ashylýyna Joǵary Sot Keńesiniń tóraǵasy B.Beknazarov, Joǵarǵy Sot apparatynyń basshysy S.Ispanov, Bas prokýrordyń orynbasary M.Isaev, oblys ákimi A.Muhambetov, oblystyq sottyń tóraǵasy E.Aıtjanov jáne sot júıesi men prokýratýra organdarynyń ardagerleri qatysty.
Joǵary Sot Keńesiniń Tóraǵasy Bektas Beknazarov Muǵaljar aýdandyq sotynyń tóraǵasy Seıfolla Tasymbetovke jańa qyzmettik avtokóliktiń kiltin tabys etti. Saltanatty rásimniń sońynda qonaqtar jas kóshetter otyrǵyzdy.
Satybaldy SÁÝIRBAI,
«Egemen Qazaqstan».
Aqtóbe oblysy.