Qarasha aıyna josparlanǵan kezekten tys prezıdent saılaýy jaqyndaǵan saıyn túrli qoǵamdyq uıymnyń belsendiligi artqany baıqalady. Saıası naýqanǵa qatysty elimizdiń túrli qoǵamdyq uıymy óz oılaryn aıtyp, usynystaryn bildirýde.
О́ńirlik alıanstardyń kóshbasshylary óz sózderinde el Prezıdenti usynǵan barlyq bastama men reforma halyqtyń, qarapaıym adamdardyń múddelerinen týyndaǵanyn aıtyp, saıası dodada Memleket basshysyn qoldaıtynyn jetkizdi.
Aýǵan soǵysy ardagerleri uıymdary da Qasym-Jomart Toqaevtyń kandıdatýrasyn prezıdent saılaýyna usyný jóninde sheshim qabyldaǵandaryn málimdedi. Aýǵan soǵysy ardagerleri uıymdarynyń Qazaqstan ardagerleri qaýymdastyǵy basqarmasynyń otyrysynda qaýymdastyq tóraǵasy Baqytbek Smaǵul: «Prezıdent ardagerler men túrli áleýmettik toptyń ókilderin árdaıym qoldap keledi. Biz ardagerler soǵystyń ne ekenin bir kisideı bilemiz ári beıbit ómirdiń qadirin óte jaqsy túsinemiz. Turaqtylyq – kez kelgen memleket úshin damýdyń eń basty kepili. Sondyqtan biz Qasym-Jomart Toqaevty prezıdent saılaýyna kandıdat retinde usyný týraly sheshim qabyldadyq», dedi.Sondaı-aq Qazaqstan máslıhattary depýtattary birlestiginiń ortalyq keńesiniń kezekten tys konferensııasynda uıym atynan Qazaqstan prezıdenttigine úmitker usyný máselesi talqylandy. «Turaqsyz geosaıası ári ekonomıkalyq jaǵdaı kezinde qoǵamnyń birligi men yntymaǵy birinshi orynǵa shyǵady. Sondyqtan Qasym-Jomart Toqaevtyń turaqtylyq pen kelisimdi qamtamasyz etýdegi, memleket damýyndaǵy erekshe rólin eskere otyryp, biz ony aldaǵy prezıdent saılaýyna kandıdat retinde usynamyz», dep atap ótti birlestik tóraǵasy Tóleýbek Muqashev.
Birlestik músheleri barlyq deńgeıdegi máslıhat depýtaty ekenin atap ótken jón. Olardyń jalpy sany – 3276 adam.
Generaldar keńesiniń tóralqasy da Q.Toqaevty prezıdent saılaýyna kandıdat retinde usyný týraly sheshim qabyldady. Uzaq jyldar boıy memleket múddesine abyroımen qyzmet etken Qazaqstannyń Qarýly Kúshteri men quqyq qorǵaý organdarynyń generaldary, ardagerleri áli de Otan múddesin qorǵaýǵa atsalysyp keledi. Memleket basshysynyń qyrkúıek aıyndaǵy Joldaýyn talqylaǵannan keıin «Generaldar keńesi» RQB tóralqasy baǵdarlamalyq qujatta baıandalǵan erejeler men usynystardy iske asyrýǵa belsendi qatysý týraly sheshim qabyldady.«Biz bıyl kúzde kezekten tys prezıdent saılaýyn ótkizý týraly usynysty tolyq qoldaımyz. Ádiletti Qazaqstan qurýǵa baǵyttalǵan reformalardy tabysty iske asyrý úshin halyq seniminiń jańa mandaty qajet. Prezıdenttik mandattyń bir rettik 7 jyldyq merzimin engizýdi ashyq demokratııalyq memlekettiń damýyndaǵy túbegeıli shara dep sanaımyz. Bul qadam elimizdiń jańa saıası dáýiriniń altyn qazyǵyna aınalady. Álemdegi kúrdeli geosaıası jaǵdaı kezinde beıbitshilik pen kelisimdi baǵalaı bilý qajet. Biz, el egemendiginiń qorǵany bolǵan ofıserler, tájirıbeli, qoǵamǵa qyzmet etýge daıyn saıasatker Qasym-Jomart Toqaevtyń kandıdatýrasyn saılaýǵa usynamyz», dedi otstavkadaǵy general-maıor, Generaldar keńesiniń tóraǵasy Mahmut Tóleǵusov.
Infografıkany jasaǵan Amangeldi Qııas, «EQ»
«Qazaqstan sportshylary odaǵy» respýblıkalyq qoǵamdyq birlestigi bolsa «Barys Arena» kesheninde sport qaýymdastyǵynyń ókilderimen kezdesip, jıyn barysynda Qasym-Jomart Toqaevty kezekten tys prezıdent saılaýyna kandıdat retinde usyný týraly sheshim qabyldaǵanyn málimdedi.
Jıynǵa qatysqan London Olımpıadasynyń chempıony Serik Sápıevtiń aıtýynsha, Memleket basshysy buqaralyq jáne kásibı sporttyń damýyna júıeli túrde qoldaý kórsetip keledi.
«Elimizdi Prezıdent Qasym-Jomart Toqaev bastaǵan jańa reformalar kútip tur. Ol áleýmettik ádildik pen barshaǵa teń múmkindikterdi basty baǵyt retinde usynady. Búginde sportshylarymyz Qazaqstannyń atynan túrli halyqaralyq arenada óner kórsetip júr. Myqty ekonomıka men birliktiń arqasynda biz úlken jetistikterge jettik. Onyń ishinde sport salasynyń jetistikteri de bar», dedi odaq múshesi S.Sápıev.
Eldegi sportshylar odaǵy ótkizgen is-sharanyń qorytyndysynda jıynǵa qatysýshylar biraýyzdan Qasym-Jomart Toqaevtyń kandıdatýrasyn qoldady.