Qazaqstannyń eńbek sińirgen qaıratkeri, Olımpıada oıyndarynyń kúmis jáne qola júldegeri Dáýlet Turlyhanov partııa múshelerin prezıdenttikke kandıdat retinde Qasym-Jomart Toqaevtyń kandıdatýrasyn qoldaýǵa shaqyrdy, dep habarlaıdy Egemen.kz.
«Elimizde ádiletti qoǵam qurý, halyqty tyńdaıtyn memleket qalyptastyrý jumystary belsendi júrgizilýde. Jyldar boıy qordalanyp qalǵan kóptegen máseleler sheshimin taba bastady. El múddesi úshin júıeli reformalar qolǵa alyndy. Sport salasyn damytýǵa erekshe kóńil bólinip, jaqsy qoldaý kórsetilýde», dedi ol «AMANAT» partııasynyń kezekten tys XXIV sezinde.
Belgili sportshy elimizdiń barlyq aımaqtarynda ámbebap sport keshenderi salynǵanyn, aýlalar men qoǵamdyq oryndarda trenajerlar ornatylǵanyn tilge tıek etti.
«Urpaqtarymyzdy deni saý, myqty etip ósirý úshin osy múmkindikterdi utymdy paıdalanýymyz kerek. Barlyǵymyzdyń ortaq Otanymyz – memleket. Bizdi ortaq maqsattar men qundylyqtar biriktiredi. Barshańyzdy Qasym-Jomart Kemeluly Toqaevty qıyn sátte qaldyrmaı, eldigimizdi uıystyrǵan qajyrly eńbegin baǵalaı otyryp, bolashaqqa, halyq múddesi jolyndaǵy tyń bastamalar men josparlarǵa sene otyryp, ony biraýyzdan qoldaýǵa shaqyramyn», dep atap ótti Dáýlet Turlyhanov.