Úkimet basshysy halyqtyń áleýmettik osal toptaryn jumyspen qamtýdy tapsyrdy, dep habarlaıdy Egemen.kz.
«Asa mańyzdy másele – halyqtyń áleýmettik osal toptaryn jumyspen qamtý. Ol úshin kásipkerlerge jaǵdaı jasaý kerek. Bıylǵy jyly Ulttyq jobalardy iske asyrý sheńberinde 269 myńnan astam jumys orny qurylýy tıis. Qazirgi ýaqytta 203 myńnan astam adam jumysqa ornalasty. Olardyń 175 myńy – ýaqytsha jumys. Biz turaqty jumys oryndaryn kóbeıtýge kúsh salýymyz kerek», dep atap ótti Premer-Mınıstr.
Ol úshin sıfrlyq tehnologııalarǵa súıený mańyzdy. Memlekettik organdardyń júıelerin tolyq ıntegrasııalaı otyryp, jumyspen qamtý servısteriniń barlyǵyn sıfrlandyrý qajet.
«Otbasynyń sıfrlyq kartasy, Elektrondyq eńbek bırjasy men Jumys oryndaryn qurýdyń ıntegrasııalanǵan kartasyn biriktirgennen keıin, jumyssyz júrgenderge elektrondyq habarlamalar arqyly vakansııalar usynýǵa bolady», dedi Á. Smaıylov.
Jumyssyzdarǵa ótinish jazbaı-aq bos jumys oryndaryn usyný mańyzdy. Mundaı qyzmetterdi smartfon arqyly qoljetimdi etý qajet. Jastardy jumyspen qamtýdyń jańa tásilderi men mehanızmderin engizýge erekshe nazar aýdarý kerek.
«Jyl saıyn eńbek naryǵyna 300 myńǵa jýyq jas shyǵady. Olardyń jumys tájirıbesi joq, sondyqtan jastarǵa birinshi kezekte jumysqa ornalasýǵa kómektesý kerek. I jartyjyldyqtyń qorytyndysy boıynsha NEET sanatyndaǵy jastardyń sany Ulytaý, Shyǵys Qazaqstan, Qaraǵandy, Qyzylorda, Jambyl jáne Almaty oblystarynda kóp. Al bul óńirlerde mamandarǵa suranys kóp. Atalǵan oblystardyń ákimdikteri jastardy oqytyp, jumysqa ornalastyrý máselesin baqylaýǵa alsyn. Jastarǵa jumyspen qamtýǵa járdemdesý sharalary týraly jetkilikti aqparat berilmeıdi. Sondyqtan osy baǵytta aqparattyq-túsindirý jumysyn kúsheıtý qajet», dedi Úkimet basshysy.