Aqmola oblysy ákimdigi tarapynan Atbasardaǵy sý tasqynynan zardap shekkender jaıy men qaıta qurý jumystary kúndelikti baqylaýda ustalýda. Búgingi kúnge deıin 379 turǵynǵa materıaldyq, 107 adamǵa qarjylaı kómek kórsetildi. Quramynda 141 múshesi bar 41 otbasy jalǵa alynǵan páterlerge qonystandyrylǵan. Sondaı-aq, gýmanıtarlyq kómek esebinen 529 turǵynǵa azyq-túlik pen kıim-keshek úlestirildi. Bul jóninde oblys basshysy Qosman Aıtmuhametovtiń kezekti sapary barysynda tolyq maǵlumat aldyq.
Oblys ákimi qaladaǵy №1 jáne 5 mektepterde turǵyndarmen kezdesý ótkizip, árbir kisiniń suraǵyna naqty jaýap qaıtardy. Munda zardap shekkenderdi ýaqytsha qonystardan jaldamaly páterlerge aýystyrý jaıy ózekti bolyp otyr. Bul baǵytta, qarjy kózderin toptastyrý arqyly, qolda bar múmkindiktiń barlyǵy jumyldyrylatyny, kóp uzamaı jańa úıler de boı kóteretindigi aıtyldy.
Jýrnalıster sý tasqynynan zardap shekken aýmaqty aralap kórip, oblys ákimi ótkizgen májiliske qatysty. Onda oblystyq basqarmalar basshylary men Atbasar aýdanynyń ákimi J.Nurkenovtiń esepteri tyńdaldy. Aýdan ákiminiń aıtýynsha, búgingi kúni joldar men ǵımarattardy qalpyna keltirý jáne qurylys jumystaryn júrgizýge qajetti barlyq saraptamalyq-tehnıkalyq qujattar ázirlenip qoıylǵan.
Búgingi kúni sý shaıyp ketken 18,3 shaqyrymdyq jolǵa aǵymdaǵy, 3,1 shaqyrymdyq jolǵa kúrdeli jóndeý jumystary qolǵa alynypty. Qalpyna keltirý barysynda 3 sý ótkelin jóndeý jumysy da josparlanypty. Eń qýanyshtysy, zardap shekken turǵyndarǵa arnalyp 45 páterlik eki úıdiń qurylysy bastalǵanyn aıtýymyz kerek. Oblys basshysy merdiger kompanııalardyń sapa kórsetkishterin jaqsartyp, ýaqytty tıimdi paıdalý qajettigin tapsyrdy.
Jalpy, zardap shekkenderge arnalyp Atbasarda 45 páterlik tórt úı salynady jáne burynǵy medısınalyq kolledjdiń jataqhanasyna qaıta qurý jumystary júrgizilip, onda 29 otbasy ornalastyrylady dep josparlanýda.
Baqbergen AMALBEK,
«Egemen Qazaqstan».
Aqmola oblysy,
Atbasar qalasy.