Parlament Májilisiniń jalpy otyrysynyń ekinshi oqylymynda depýtattar «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasyn maquldady, dep habarlaıdy Egemen.kz.
«Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy memlekettik jastar saıasaty salasyndaǵy zańnamany jetildirýge jáne jastardyń quqyqtary men múddelerin qorǵaýǵa baǵyttalǵan. Zań jobasymen jumys barysynda depýtattar «jastar» uǵymynyń jas sheńberin 29 jastan 35 jasqa deıin ulǵaıtýǵa baǵyttalǵan túzetýler engizdi, bul jastardyń áleýmettik belsendiligin arttyrýǵa, optımızmdi, erteńgi kúnge degen senimdilik sezimin nyǵaıtýǵa múmkindik beredi. «Jastardyń áleýmettik qyzmetteri» jáne «ýaqytsha turaqsyz jastar» uǵymdary naqtylanady», dedi depýtat Jámılá Nurmanbetova Májilis otyrysynda.
Budan basqa, Memleket basshysynyń 2022 jylǵy 1 qyrkúıektegi «Ádiletti memleket. Birtutas ult. Berekeli qoǵam» atty Joldaýynyń aıasynda depýtattar zańnyń áleýmettik blogyna túzetýler engizdi.
Atap aıtqanda, áńgime áıelder úshin zeınetkerlikke shyǵý jasyn 61 jas deńgeıinde bekitý, jasyna baılanysty zeınetaqy tólemderin esepteý úshin tabys shegin 46 eseden 55 esege deıin ulǵaıtý, eńbek etý qabiletinen aıyrylǵan, sondaı-aq asyraýshysynan aıyrylǵan jaǵdaıda aı saıynǵy áleýmettik tólemnen shegerim mólsherin 55 eseden azaıtý týraly bolyp otyr. Sondaı-aq ETJ ósýine baılanysty áleýmettik tólemder mólsherin azaıtýdy boldyrmaý maqsatynda eń tómengi jalaqy mólsheriniń 50%-na deıin, sondaı-aq jumysynan aıyrylǵan jaǵdaıda áleýmettik tólemdi esepteý úshin almastyrý koeffısıentin túzetý máseleleri zerdelendi.
«Zań jobasy sheńberinde qaralatyn máseleler aıasynyń keńeıýin eskere otyryp, depýtattar zań jobasynyń taqyrybyn «Qazaqstan Respýblıkasynyń keıbir zańnamalyq aktilerine memlekettik jastar saıasaty jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» dep ózgertý jóninde usynys engizdi», dep tolyqtyrdy Jámılá Nurmanbetova.
Osylaısha, Májilis ekinshi oqylymda zań jobasyn maquldady. Tıisti qaýly qabyldandy.