Qaıta jańǵyrǵan Respýblıka kúnine oraı Shyǵys Qazaqstan oblysynda kópbalaly otbasylarǵa jańa úılerdiń kiltteri tabystaldy. Qýanyshty is-shara oblystyń úsh aýdanynda ótti. Atap aıtsaq, Glýbokoe, Tarbaǵataı jáne Ulan aýdandarynyń kópbalaly otbasylarǵa jańa úıdiń kiltteri tabystaldy.
«Bir qabatty Shyǵys» óńirlik jobasy aıasynda salynǵan jańa turǵyn úılerge qol jetkizý kópbalaly otbasylar úshin kópten kútken sát edi. Máselen, osy baǵdarlama boıynsha Glýbokoe aýdanynda 10 otbasy, Tarbaǵataı aýdanynda 6 otbasy, Ulan aýdanyna qarasty Gerasımovka aýylynda 12 otbasy jáne Saǵyr aýylynda 6 otbasyna páter kilti tabystaldy.
– Bizge búgin baspanaly bolý baqyty buıyrdy. Prezıdent Qasym-Jomart Toqaevtyń tapsyrmasy boıynsha úıli bolyp jatqan jaıymyz bar. «Úıi joqtyń kúıi joq» deýshi edi ǵoı. Buıyrsa, úıli, kúıli kúnderge qadam bastyq. Biz el ıgiligi úshin jumys isteıtin barlyq qyzmetkerlerge jáne osy úılerdiń qurylysyn júrgizgen qurylysshylarǵa alǵysymyzdy bildiremiz. Barshańyzǵa amandyq, balalaryńyzǵa jarqyn bolashaq tileımin! – dep júrekjardy lebizin bildirdi Glýbokoe aýdanynyń turǵyny Merýert Mahtıeva.
Glýbokoe aýdanynyń ákimdiginde atap ótkendeı, Glýbokoe kentinde 2021 jyly «Bir qabatty Shyǵys» baǵdarlamasy boıynsha 20 jańa otbasy qonystanǵan. Al 2022 jyly taǵy 10 jańa úı salyndy. Bul jaqsy kórsetkish deýge negiz bar. Úılerdiń sapasy da kóptiń kóńilinen shyǵyp jatyr.
Ulan aýdanynda da ekinshi jyl qatarynan «Bir qabatty Shyǵys» baǵdarlamasy júzege asyrylyp jatyr. Saǵyr aýylynyń turǵyny Kúlpash Dáleldiń aıtýynsha, Respýblıka kúni merekesiniń mańyzy úı alǵan otbasylary úshin eki ese artady.
– Merekelik sharaǵa óte qýanyshtymyz. Endi jyl saıyn Respýblıka kúni úıli boldyq dep toılatyp jatatyn shyǵarmyz, – deıdi Ulan aýdanynyń turǵyny Kúlpash Dálel.
Sonymen qatar bul kúnderi oblystyń birqatar aýdanynda jańa áleýmettik nysandar ashyldy. Zaısan aýdanynda aýdandyq meshit janyndaǵy jańa Mádenıet úıi men medrese mekemesiniń saltanatty ashylýy ótti. Shemonaıha aýdanynda dene shynyqtyrý-saýyqtyrý kesheniniń lentasy qıyldy. Keshenniń ashylýyn asyǵa kútken jastar Memleket basshysynyń halyq únine qulaq asyp jatqanyn aıtyp, rızashylyǵyn bildirdi.
– Aýdan jastaryna bos ýaqytyn tıimdi ótkizetin oryn óte kerek edi. Bul týraly buryn da aıtylǵan. Tegi, turǵyndardyń usynysy quzyrly organdarǵa jetti me, áıteýir tez arada dene shynyqtyrý-saýyqtyrý kesheni boı kóterdi. Alǵys aıtamyz, – dedi Shemonaıha aýdanynyń turǵyny Ekaterına Beısembaeva.
Mereke kúnderi Shyǵys Qazaqstan oblysynda turǵyn úılermen qatar, onnan astam áleýmettik nysan paıdalanýǵa berildi.
Shyǵys Qazaqstan oblysy