Búgin Qaraǵandy oblysyndaǵy shahtada gaz jarylyp, qaza tapqandar sany bes adamǵa jetti. «ArselorMıttal Temirtaý» AQ kómir departamentiniń dırektory Arman Qalyqov qaza bolǵandar men zardap shekkenderdiń otbasylaryna kómek kórsetiletinin aıtty, dep habarlaıdy Egemen.kz.
«Qaza bolǵandardyń otbasylarynan, kenshilerimizdiń áriptesterinen keshirim suraımyz. Qaza bolǵandar men zardap shekkenderdiń barlyq otbasylaryna kómek kórsetiledi», dedi «Arselor Mıttal Temirtaý» kómir departamentiniń dırektory Arman Qalyqov.
Qaıǵyly oqıǵa 3 qarashada saǵat 03:00 shamasynda Shahtınsk qalasyndaǵy Lenın atyndaǵy shahtada boldy. Gaz drenajdyq uńǵymalardy burǵylaý kezinde gaz kenetten jarylǵan. Apat saldarynan bes jumysshy qaza taýyp, tórteýi aýrýhanaǵa jetkizildi.
Tótenshe jaǵdaılar mınıstri Iýrıı Ilın oqıǵa ornyna baryp, apatty tekseretin arnaıy komıssııany basqarady. Tergeý qorytyndysy boıynsha oqıǵanyń sebepteri men mán-jaıy anyqtalýda. Aldyn ala málimet boıynsha, 106 jumysshy evakýasııalanǵan.