Ortalyq saılaý komıssııasynyń tóraǵasy Nurlan Ábdirov kezekten tys prezıdent saılaýyn daıyndaý jáne ótkizý máseleleri boıynsha Pavlodar jáne Aqmola oblystarynyń aýmaqtyq jáne ýchaskelik saılaý komıssııalaryna ınspeksııalyq saparmen bardy.
Atap aıtsaq, N.Ábdirov Pavlodar oblysynyń Besqaýǵa jáne Shiderti aýyldaryndaǵy, Aqmola oblysynyń Maltabar jáne Ereımentaý qalalaryndaǵy bes saılaý ýchaskesinde boldy. Sapar barysynda ortalyq saılaý komıssııasynyń basshysy aýmaqtyq jáne ýchaskelik saılaý komıssııalarynyń múshelerimen, sondaı-aq jergilikti atqarýshy organdardyń ókilderimen jalpyhalyqtyq daýys berýdi daıyndaý jáne ótkizý máseleleri boıynsha kezdesýler ótkizdi.
Ýákiletti memlekettik organdar men saılaý komıssııalarynyń músheleri OSK tóraǵasyna óńirlerde saılaýshylar tizimderi boıynsha júrgizilip jatqan jumystardy, saılaýdy uıymdastyrý, materıaldyq-tehnıkalyq qamtamasyz etý, múgedek azamattar úshin saılaý ýchaskeleriniń fızıkalyq qoljetimdiligi úshin qajetti jaǵdaılar jasaý, saılaý bıýlletenderin kúzetý jáne ýaqtyly jetkizý týraly baıandady.
Máselen, Pavlodar oblysynyń ASK tóraǵasy Gúlnar Amanjolova óńirdegi saılaýshylar tizimine 510 847 azamat engizilgenin habarlady. 30 qazanda saılaýshylar tizimi akt boıynsha óńirdiń barlyq saılaý ýchaskesine berildi, al 4 qarashadan bastap olar saılaýshylarǵa tanysýǵa usynyldy. Ol sondaı-aq saılaý ýchaskelerine 5 109 syrttaı kýálikti daıyndaý jáne berý týraly habardar etti. Aqparattyq qamtamasyz etý sheńberinde saılaýshylardyń mekenjaılary boıynsha ýaqtyly jetkiziletin 409820 shaqyrý men plakat daıyndalyp, ornalastyrylǵan. Daýys berý kúni 225 saılaý ýchaskesinde azamattardy tirkeýdi tekserý boıynsha servıs, al Mobıldik HQKO-lardyń 6 jumysy uıymdastyrylady. Bekitilgen kestege sáıkes saılaý komıssııalarynyń múshelerin oqytý boıynsha jumys jalǵasýda.
Besqaýǵa aýyldyq ýchaskelik saılaý komıssııasynyń tóraǵasy Aısulý Ábisheva aýyldaǵy saılaýshylar tiziminde múgedektigi bar adamdar joq ekenin, biraq soǵan qaramastan saılaý ýchaskesinde basqa óńirlerden kelgen azamattar olarǵa esepten shyǵarý kýálikteri boıynsha júgingen jaǵdaıda MBA daýys berýi úshin barlyq jaǵdaı jasalǵanyn habarlady. Shiderti aýylyndaǵy saılaý ýchaskesinde de múmkindigi shekteýli azamattarǵa qolaıly jaǵdaı qarastyrylǵan. Atap aıtqanda, daýys berýge arnalǵan úı-jaı ǵımarattyń birinshi qabatynda ornalastyrylǵan. Ǵımaratqa kireberiste tirek fýnksııalary buzylǵan saılaýshylardyń qoljetimdiligin eskere otyryp, jasyryn daýys berýge arnalǵan tutqalar, pandýs, úı-jaıda daýys berýge arnalǵan kabınalar, qozǵaltqysh apparaty, onyń ishinde kreslo-arbalardy paıdalanatyndar, qosymsha jaryqtandyrý quraldary bar. Nurlan Ábdirov elimizdegi daýys berýge arnalǵan barlyq 10 101 ýchaske Braıl shrıftimen arnaıy trafarettermen qamtamasyz etiletinin erekshe atap ótti.
Aqmola oblysynyń ASK tóraǵasy Manarbek Sádýov óńir boıynsha saılaýshylar tizimine 517 031 azamat engizilgenin baıandady. Munda da 30 qazanda saılaýshylardyń tizimderi akt boıynsha saılaý ýchaskelerine berildi jáne 4 qarashadan bastap saılaýshylarǵa tanysýǵa usynyldy. Oblystyq ASK 5 170 esepten shyǵarý kýáligi daıyndalyp, saılaý ýchaskelerine berilgen. Aqparattyq qamtamasyz etý sheńberinde 345 100 shaqyrý men plakat daıyndalyp, ornalastyrylǵan, olar aldaǵy kúnderi saılaýshylardyń mekenjaılary boıynsha jetkiziledi. Daýys berý kúni 173 saılaý ýchaskesinde azamattardy tirkeýdi tekserý boıynsha servıs, al Mobıldik HQKO-lardyń 5 jumysy uıymdastyrylady. Saılaý komıssııalarynyń múshelerin oqytý boıynsha jumys bekitilgen keste boıynsha júrgiziledi.
Inspeksııalyq sapar aıasynda Nurlan Ábdirov komıssııa músheleriniń nazaryn daýys berýge arnalǵan úı-jaılardyń tek saılaýshylar úshin ǵana emes, baıqaýshylar, senim bildirilgen adamdar jáne buqaralyq aqparat quraldarynyń ókilderi úshin de qoljetimdiligi men yńǵaılylyǵyn qamtamasyz etý qajettigine aýdardy. Saılaýdy uıymdastyrý jáne ótkizý maqsatynda qoldanystaǵy zańnamanyń qatań talaptaryna sáıkes, daýys berýge arnalǵan jekelegen úı-jaılardy sol saılaý ýchaskesi sheginde saılaý úderisiniń barlyq qatysýshysy úshin neǵurlym keń jáne yńǵaıly úı-jaılarǵa aýystyrý týraly sheshimder qabyldandy.
Sapar barysynda OSK tóraǵasy saılaýshylarǵa tizimderde ózderin tekserýge múmkindik beretin onlaın servısterdiń jumysyn tekserip, saılaý komıssııalary múshelerin elektoraldyq oqytý nátıjelerimen tanysty.
Kezdesýlerdiń qorytyndysy boıynsha Nurlan Ábdirov aýmaqtyq jáne ýchaskelik saılaý komıssııalarynyń tóraǵalaryna ýchaskelerdi aqparattyq-tehnıkalyq jaraqtandyrý, olardyń azamattar úshin, onyń ishinde múmkindigi shekteýli adamdar úshin qoljetimdiligi men yńǵaılylyǵy, daýys berý kúni tıimdi baıqaý úshin jaǵdaılardy qamtamasyz etý jóninde birqatar naqty tapsyrma berdi.