Memleket basshysy Mańǵystaý aımaǵynda aldaǵy úsh jylda 21 mektep salynatynyn aıtty, dep habarlaıdy Egemen.kz Aqordanyń resmı paraqshasyna silteme jasap.
«Orta bilim berý salasyndaǵy jaǵdaı da máz emes. Oblystaǵy 13 myń oqýshyǵa mektepten oryn jetpeı jatyr. Apatty jaǵdaıda turǵan, úsh aýysymmen oqytatyn mektepter bar. «Jaıly mektep» ulttyq jobasy boıynsha Mańǵystaý aımaǵynda aldaǵy úsh jyldyń ishinde 21 mektep salynady. Biraq bul da jetkiliksiz», dedi Prezıdent Mańǵystaý oblysyndaǵy jıynda.
Sondaı-aq ol oblys ákimdigine úsh jyldyń ishinde úsh aýysymmen oqytatyn mektepterdiń máselesin tolyq sheshýdi tapsyrdy.
«Bul jumysta bıznestiń múmkindigin keńinen paıdalanǵan jón. Qajetti tájirıbe bar. Sońǵy eki jylda aımaqta 19 jekemenshik mektep ashylǵan. Oblysta qala men aýyl, Aqtaý men Jańaózen mektepteri arasynda bilim sapasy boıynsha orasan zor alshaqtyq bar. Buǵan jol berýge bolmaıdy», dep túıindedi Memleket basshysy.
Prezıdent bilim deńgeıi ár balanyń tulǵa bolyp qalyptasýyna áser etetinin aıtyp, barlyq oqýshyǵa birdeı sapaly bilim berilýi keregin aıtty.