Memleket basshysy Mańǵystaý oblysynyń jurtshylyǵymen kezdesýde jem-shóp baǵasyn arzandatý máselesine nazar aýdarýdy usyndy, dep habarlaıdy Egemen.kz Aqordanyń resmı paraqshasyna silteme jasap.
«Oblys halqy qıyndyqqa tap bolǵanda jurtymyz búkil el bolyp kómek qolyn sozdy, berekeli birligin kórsetti. Mańǵystaý oblysy jyl saıyn mal azyǵynyń 75 paıyzyn basqa oblystardan alady. Sondyqtan jem-shóptiń baǵasyn arzandatý máselesi óte ózekti», dedi Memleket basshysy.
Onyń aıtýynsha, ózge óńirlerden mal azyǵyn tasymaldaý úshin jeńildetilgen tarıfter engizý jolyn qarastyrý kerek.
«Agroónerkásip kesheniniń ónimdiligin arttyrý úshin ǵylymı mekemelermen tyǵyz yntymaqtastyq ornatý mańyzdy. Sondaı-aq qolda bar múmkindikti jáne óńirdiń erekshelikterin tıimdi paıdalanǵan jón», dedi Qasym-Jomart Toqaev.
Prezıdent óńirdiń klımattyq jaǵynan qolaılyǵyn aıta kele munda jylyjaı salý arzan bolatynyn sóz etti.
«Onyń jylýy men jaryǵyna elektr qýaty az jumsalady. Sýy az, topyraǵy qunarsyz jerde aýyl sharýashylyǵyn damytýdyń birden-bir joly – jańa tehnologııalardy engizý. Aýa raıy osy aımaqqa uqsaıtyn Izraıl sııaqty elderdiń ozyq tájirıbesin muqııat zertteý qajet», dep túıindedi Q. Toqaev