Memleket basshysynyń tapsyrmasyna oraı Indýstrııa jáne ınfraqurylymdyq damý mınıstrligi Almaty jáne Qonaev qalalary arasynda jańa jolaýshylar temir jol baǵytyn ashý máselesin qarastyrǵan bolatyn. Osyǵan sáıkes bıylǵy jyldyń 11 qarashasynan bastap Almaty – Qonaev poıyz baǵyty ashylady, dep habarlaıdy Egemen.kz IIDM baspasóz qyzmetine silteme jasap.
Poıyz táýligine bir ret júredi. Jyljymaly quram Almaty-1 stansııasynan saǵat 06:44-te jóneltilip, Qapshaǵaı stansııasyna saǵat 08:35-te keledi. Al Qapshaǵaı stansııasynan saǵat 19:15-te jóneltilip, Almaty-1 stansııasyna saǵat 20:50-de jetedi.
«Poıyz quramynda jalpy jolaýshylar syıymdylyǵy 175 oryndy quraıtyn 3 vagon bar. Tasymaldaýdy «Jolaýshylar tasymaly» AQ júzege asyrady», delingen habarlamada.
Eske sala keteıik, Memleket basshysy jańa poıyz baǵytyn ashý týraly Almaty oblysyna jasaǵan saparynda aıtqan edi.