Aqmola oblysynyń ortalyǵyndaǵy Bilim-ınnovasııa lıseıiniń ǵımaratynda ornalasqan №24 ýchaskege saılaýshylar tań sáriden kele bastady, dep habarlaıdy Egemen.kz.
Ýchaskede 2864 saılaýshy tirkelgen. Ýchaskelik saılaý komıssııasynyń tóraǵasy Jumabaı Sádýaqasovtyń aıtýyna qaraǵanda, daıyndyq jumystary tııanaqty júrgizilgen. Múmkindigi shekteýli adamdarǵa daýys berý úshin qolaıly jaǵdaı jasalady.
«16 adam úılerinde daýys beredi.Eshkim de qalys qalmaýy kerek qoı. Biz azamattardyń daýys berýine barlyq jaǵdaıdy jasaımyz», deıdi komıssııa tóraǵasy.
Saılaýshylarmen de tildestik. Halyq el bolashaǵyna beı-jaı qaramaıdy. Saıası belsendiliktiń joǵary bolýy sondyqtan.
«Endigi arada adamdar beıjaılyqty qoıýy kerek. Osynyń barlyǵy elimizdiń bolashaǵy úshin jasalyp jatqan sharýa. Sondyqtan árkim óziniń júrek qalaýyn aıqyndap, egemen elimizdiń keregesi keńip, ádil de jaıly qoǵam ornatý úshin óz tańdaýlaryn jasaýy kerek. Búgin kórshilerimiz de, jaqyn mańda turatyn tanystarymyz da erte turyp, saılaý ýchaskesine kelip jatyr. Osynyń barlyǵy el ishindegi birlikti, keleshekke degen alańdaýshylyqty bildiredi emes pe? Sál ǵana ýaqytyńyzdy alyp, kókiregimde jattalyp qalǵan eski bir sýretti tirilte keteıinshi. Baıaǵyda bala kezimizde ata-analarymyz qulqyn sáriden turyp, baryn kıip, baılaýyn taǵyp, naq bir merekedegideı saılaý ýchaskesine bet alatyn. Biz, balalar úlkenderdiń boıyndaǵy jaýapkershilik sezimdi jete túsinbesek te, solarmen birge turyp, shyǵaryp salatynbyz. Búgin men de balalar men nemerelerdiń qulaǵyna quıyp shyqtym. Erteń olar da kámelettik jasqa tolǵan kezde el bolashaǵyn ózderi tańdaıtyndyqtaryn bilip júrsin degenim ǵoı», deıdi qala turǵyny Ermek Jańatov.
Oblys ortalyǵyndaǵy saılaý ýchaskelerindegi jaýapty naýqan jaýapkershilikpen júrip jatyr.