Túrki memleketteriniń Parlamenttik Assambleıasy mıssııasynyń basshysy, Túrkııa Uly Ulttyq jınalysynyń múshesi Erbol Kaıa Qazaqstandaǵy prezıdent saılaýy ádildik qaǵıdattary men halyqaralyq standarttarǵa sáıkes ótkenin rastady, dep habarlaıdy Egemen.kz.
«Saılaý halyqaralyq standarttar men qujattarǵa sáıkes ótkizilgenine kýá boldyq. 2022 jyly 5 maýsymda referendým ótip, Qazaqstan Konstıtýsııasynyń 33 babyna ózgeris engizildi. Referendýmnyń nátıjelerine sáıkes, Prezıdent jeti jyldyq merzimge saılanady. Bizdiń delegasııa 17 qarashada kezekten tys prezıdent saılaýyn baqylaý boıynsha jumysyn bastady. Saılaýdy baqylaý baǵdarlamasy aıasynda QR OSK tóraǵasy Nurlan Ábdirovpen, QR Parlamenti Senatynyń tóraǵasy Máýlen Áshimbaevpen, Májilis Spıkeri Erlan Qoshanovpen birqatar kezdesý ótkizdik. Kezdesýler barysynda biz saılaýǵa daıyndyqty baqylap, qosymsha aqparat aldyq, kandıdattarmen de sóılestik. Biz kandıdattardyń baǵdarlamalarymen de tanystyq», dedi TúrkPA Parlamenttik Assambleıasy mıssııasynyń basshysy jýrnalısterge bergen suhbatynda.
Ol TúrkPA músheleri saılaý ýchaskeleri ashylǵannan bastap daýystardy sanaý bastalǵanǵa deıin saılaý prosesin baqylaǵanyn atap ótti.
«Saılaý kúninde Ortalyq saılaý komıssııasy bizge barlyq nusqaýlyqtardy berdi. Jalpy saılaý tynysh ótti. Biz Qazaqstan Prezıdentin saılaý barysyna oń baǵa beremiz. Bizdiń delegasııa saılaýdyń joǵary, kásibı deńgeıde ótkenin rastaıdy. Sondaı-aq múmkindigi shekteýli jandarǵa barlyq jaǵdaı jasalǵany da qýantady. OSK derekterine sáıkes saılaýshylardyń belsendiligi 69,43%-dy qurady. Saılaýshylardyń 81,31%-y Qasym-Jomart Toqaevqa daýys berdi. Biz saılaýdyń ulttyq zańnamaǵa jáne halyqaralyq standarttarǵa sáıkes ótkenin rastaımyz», dep atap ótti Erbol Kaıa.