Qazirgi kezde bank jáne saqtandyrý ónimderi tek aqshany saqtaıtyn jáne ómirdi qorǵaıtyn emes, sonymen birge aqsha jınap, kóbeıtetin fýnksııaǵa da ıe bolyp jatyr. Birte-birte ınvestısııalaý saqtandyrý naryǵyna birjola kirigip ketetin syńaıly. Bul rette Memlekettik bilim berý jınaqtaý júıesin (MBJJ) atap ótsek bolady.
Qarjy naryǵyn retteý jáne damytý agenttiginiń habarlaýynsha, osy baǵdarlama arqyly kez kelgen ata-ana Qazaqstanda nemese shetelde kásiptik jáne joǵary oqý oryndarynyń aqysyn tóleýge jetkilikti aqsha jınaı alady. Qazir MBJJ baǵdarlamasyna 4 ekinshi deńgeıli bank qatysyp jatyr. Olarda 33,5 mlrd teńge qarjysy bar 22 myńnan astam bilim berý depozıtteri ashylǵan.
Mundaı ınvestısııalyq ónimdi banktermen qatar saqtandyrý uıymdary da usynady. MJBB sheńberinde bilim berý jınaqtaýshy ómirdi saqtandyrý shartyna qol qoıý arqyly ata-analar saqtandyrý uıymy eseptegen ınvestısııalyq kiristen basqa jylyna 5 paıyz memleket syılyqaqysyn ala otyryp, balalarynyń oqýy úshin jınaqtaýǵa múmkindik alady (halyqtyń basym sanatyna, mysaly, jetimderge, múgedekterge, kópbalaly otbasy balalaryna – jylyna 7 paıyz).
Bul saqtandyrý óniminiń birneshe artyqshylyǵy bar. Birinshiden, depozıtten aıyrmashylyǵy (8 paıyzdan 10 paıyzǵa deıin) saqtandyrý shartynyń barlyq merziminde kiristilik mólsherlemesine kepildik beriledi. Ekinshiden, Saqtandyrý tólemine kepildik berý qory barlyq jınalǵan somany tolyǵymen jabady. Al Qazaqstan depozıtterge kepildik berý qory tek 20 mln teńgege deıingi somalardy tólep beredi. Úshinshiden, ata-anasy eńbek qabiletinen aıyrylǵan nemese qaıtys bolǵan jaǵdaıda jınaqtalǵan soma mólsherine qaramastan oqý quny tolyǵymen tólenedi.
Bilim berý jınaqtaý saqtandyrý ónimin engizý kóptegen ata-ananyń óz balasynyń oqýy úshin qarjy jınaýyna múmkindik beredi. Bul – memleket tarapynan sýbsıdııalanatyn alǵashqy saqtandyrý ónimi.
Eske salaıyq, 2022 jyldyń 12 qyrkúıeginde saqtandyrý uıymdarynyń MBJJ baǵdarlamasyna qatysýyna múmkindik beretin ózgerister jasaldy.