QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda «Jaıly mektep» ulttyq jobasyn iske asyrý máseleleri qaraldy, dep habarlaıdy Egemen.kz OKQ-ǵa silteme jasap.
Oqý-aǵartý mınıstri Ashat Aımaǵambetov Ulttyq joba Memleket basshysynyń tapsyrmasy boıynsha mektep ınfraqurylymyn jańǵyrtý úshin ázirlengenin aıtty. Onyń aıasynda 842 myń oqýshyǵa arnalǵan jańa formattaǵy oqý oryndarynyń aýqymdy qurylysy júrgiziledi.
Máselen, jaıly mektepter qajetti oqý jabdyqtarymen, túrli pándik kabınettermen, beınebaqylaý jáne dybystyq habarlaý júıelerimen, balalarǵa arnalǵan jeke shkaftarmen tolyq jabdyqtalatyn bolady.
Mundaı mektepter aýylda da, qalada da biryńǵaı standart boıynsha salynady. Oǵan qosa, onda erekshe qajettilikteri bar balalar úshin jaǵdaı jasalatyn bolady.
Sonymen qatar, mınıstrdiń aıtýynsha, jańa mektepter úshin muǵalimderdi daıarlaý jáne biliktilik arttyrý jumystary jalǵasady. Jalpy 2026 jylǵa qaraı 100 myńǵa jýyq maman daıyndalady dep josparlanǵan.
Premer-Mınıstr «Jaıly mektep» ulttyq jobasy mektepterdegi oryn tapshylyǵyn boldyrmaýǵa, apatty jaǵdaıdaǵy jáne úsh aýysymdy mektepter máselesin sheshýge baǵyttalyp otyrǵanyn atap ótti. Sondaı-aq jańa bilim ordalarynda pándik kabınetter, kompıýterlik synyptar, zerthanalar men sheberhanalar bolady.
«Bastaýysh jáne joǵary synyptarǵa arnalǵan bólek bloktar qarastyrylǵan. Ár bloktyń óz ashanasy men sport zaly bolady. Mektep ishinde oqýlyqtar men jeke zattardy saqtaýǵa arnalǵan jeke shkaftar ornatylady. Osylaısha, oqýshylardyń aýyr sómkelerin birshama jeńildetýge múmkindik týady», dedi Álıhan Smaıylov.
Úkimet basshysynyń aıtýynsha, sondaı-aq oqýshylarǵa yńǵaıly bolý úshin transformer-partalar men «aýyzsý fontandary» qoıylady. Ár qabatta oqýshylarǵa arnalǵan tynyǵý alańdary bolady.
Premer-Mınıstr 2023-2025 jyldary elimizde 401 jaıly mektep salý josparlanyp otyrǵanyn aıtty. Jalpy jobany iske asyrýǵa respýblıkalyq bıýdjetten 2,6 trln teńge bólindi.
«Jobany iske asyrý balalardyń jaqsy bilim alýy úshin qajetti jaǵdaı jasaýǵa múmkindik beredi. О́ńir ákimderi jyl sońyna deıin jer ýchaskelerin bólip, ınjenerlik kommýnıkasııalardy júrgizý máselesin muqııat oılastyrýy qajet», dedi Álıhan Smaıylov.
Taqyrypty qorytyndylaı kele, Úkimet basshysy Oqý-aǵartý mınıstrligine múddeli memlekettik organdarmen jáne ákimdiktermen birlesip, jobadaǵy is-sharalardyń ýaqytyly oryndalýyn qamtamasyz etýdi tapsyrdy.