2022 jyldyń qarashasyndaǵy jaǵdaı boıynsha elimizde eń tanymal mobıldi telefon ataǵyn Samsung smartfony jeńip alǵan. Statcounter GlobalStats deregine qaraǵanda, onyń naryqtaǵy úlesi 35,6 paıyzdy quraıdy. Basty básekeles – Apple úlesi 21,1-den 24,1 paıyzǵa ósken. Úshtikti túıindeıtin qytaılyq Xiaomi brendiniń úlesi 15,9-dan 19,4 paıyzǵa ósken.
Qazaqstandyqtar arasynda Xiaomi-dan bólek taǵy birneshe qytaılyq smartfon erekshe tanymaldylyqqa ıe. Bular – Oppo (9,4 paıyz), Huawei (4,6 paıyz), Vivo (3,9 paıyz), Realme (1 paıyz) jáne OnePlus (0,4 paıyz). Kezinde erekshe ataqqa ıe bolǵan LG ónimderi nebári 0,2 paıyzdyq mejeni baǵyndyra alǵan.
2021 jyldyń qorytyndysy boıynsha elimizde 1 myń adamǵa 767 mobıldi telefonnan keledi. Salystyrar bolsaq, 2012 jyly 1000 adamǵa 579 telefonnan kelgen eken. Uıaly baılanystyń mańyzdy artyqshylyǵy – qalalyq jáne aýyldyq turǵyndar arasyndaǵy shekarany buzyp, aqparatqa, qyzmetterge, sonyń ishinde memlekettik qyzmetterge teń qoljetkizýge múmkindik beredi. Atap aıtqanda, 2021 jyly qalalyq jerlerde 1000 adamǵa shaqqanda 795 uıaly telefon, aýyldyq jerlerde 726 telefon bolǵan.
Sıfrlyq teńdikke qoljetkizýde mobıldi ınternettiń qoljetimdiligi men qamtý deńgeıi mańyzdy ról atqarady. Qazaqstannyń jer kólemi óte úlken bolǵandyqtan onyń árbir túkpirin ınternetpen qamtý da ońaıǵa soqpaıdy. International telecommunication Union málimetteri boıynsha, 2020 jyly halyqty mobıldi ınternetpen qamtý 98 paıyzdy qurasa, sonyń 81 paıyzy – 4G jelisine tıesili. 2014 jyly 4G mobıldi ınternetpen halyqty qamtý 43 paıyzdy quraǵan.
Byltyrdan beri 5G taqyryby jıi sóz bola bastady. Sıfrlyq damý mınıstri 5G shymyldyǵyn Túrkistanda ashyp, endi Astana, Almaty, Shymkent bul ıgilikke jyl sońyna deıin qol jetkizedi degen edi. 2023-2025 jyldary oblys ortalyqtaryn atalǵan mobıldi ınternet júıesine qosý josparlanǵan. Sarapshylardyń aıtýynsha, 5G kelgen soń oǵan smartfon da saı bolýǵa tıis. 5G júıesin kótere alatyn qytaılyq smartfondardyń baǵasy 100 myń teńgeden bastalsa, Samsung pen Apple ónimderi 250 myń teńgeden joǵary saýdalanady. Flagmandyq modelder tipti qymbat.
Beeline Kazakhstan deregine súıener bolsaq, bul kompanııa abonentteriniń nebári 6 paıyzynda 5G-ǵa saı keletin smartfon bar. Brend bólinisinde, 5G-dy qoldaı alatyn telefondardyń 57 paıyzy – Apple, 22 paıyzy – Samsung flagmandyq modelderine, 10 paıyzy – Xiaomi-ǵa, 11 paıyzy ózge brendterge tıesili eken. Taǵy bir mańyzdy jaıt, tutynýshylar telefon satyp alar kezde negizinen smartfonnyń qýat kúshine, jadynyń kólemine, kamera sapasyna, paıdalaný qarapaıymdylyǵyna, qýatty ári jedel prosessoryna, dıspleı kólemine jáne brend ataýyna mán beredi. Endi birtindep smartfonnyń 5G-ǵa saı nemese saı emestigi de basty krıterıılerdiń birine aınalary sózsiz. Eger memleket el aýmaǵyn 5G júıesimen laıyqty deńgeıde jabdyqtaı alsa, árıne.
Eske salaıyq, 5G jelisi álemde 2019 jyly iske qosyldy. Qazir mobıldi baılanystyń besinshi býynyn 83 elde 209 operator usynyp otyr. Sıfrlyq damý mınıstri Baǵdat Mýsınniń aıtýynsha, 5G-ǵa ótý bizdi basqa deńgeıge shyǵarady.
«4G paıda bolǵan kezde Instagramda Reels-tiń, TikTok bolaryn eshkim túsingen joq. Bul sıfrlyq álemniń jańa kezeńi bolady dep eshkim kúte qoımap edi. Endi biz metaálem kezeńine ótemiz. Qazaqstan jahandyq tendensııalardan keshigip qalmaýǵa tıis», dedi mınıstr.
5G máselesine oraı vedomstvo Qazaqstanda atalǵan standartty engizý úshin baılanys operatorlary arasynda jıilikti úlestirýdiń elektrondy saýdasyn uıymdastyrdy. Mınıstrlik 2 lot oınatyp otyr. Árbiriniń quny – 1 mlrd 761 mln 225 myń teńge. Jeńimpaz bolǵan kompanııa alǵashqy jyl ishinde Astana, Almaty jáne Shymkent qalalarynda 5G jelisiniń 391 bazalyq stansasyn ornatýǵa tıis. Odan keıingi tórt jylda oblys ortalyqtarynda 784 bazalyq stansa salýǵa mindetti. Eki aýksıon ótkiziletinin eskersek, aldaǵy bes jylda elimizde 3600-3800 MGs radıojıilik dıapazonynda 7 054 bazalyq stansa salynýy kerek.