Eńbek jáne halyqty áleýmettik qorǵaý mınıstrliginiń Áleýmettik-eńbek salasy boıynsha Qoǵamdyq keńesiniń kezekti otyrysyna qatysýshylar 2022 jyly halyqty jumyspen qamtýǵa járdemdesý sharalaryn, áleýmettik-eńbek salasynyń qoǵamdyq mańyzy bar máseleleri boıynsha jeke jáne zańdy tulǵalardyń ótinishterin qarady, dep habarlaıdy Egemen.kz vedomstvonyń baspasóz qyzmetine silteme jasap.
Osylaısha, halyqty jumyspen qamtýǵa járdemdesýdiń kórsetilgen sharalary jáne osy baǵyttaǵy aldaǵy josparlar týraly Eńbek mınıstrligine qarasty halyqty jumyspen qamtý departamentiniń dırektory Asqar Nııazov aıtyp berdi.
О́z sózinde ol eńbek naryǵynyń qazirgi jaı-kúıi, 2022 jyl ishinde qol jetkizilgen jumysqa ornalasý kórsetkishteri týraly habardar etip, sol kórsetkishterge qol jetkizgen qoldaý sharalaryna egjeı-tegjeıli toqtalyp ótti.
Onyń aıtýynsha, 2021 jyly jumys kúshiniń ósý qarqyny eki ese artyp, 76 myń adamǵa jetti.
«Bul rette eńbek naryǵyna pandemııa da, álemdik ekonomıkalyq úrdister de áser etti. Sonymen qatar, qazir eńbek naryǵyna eki myńynshy jyldary týǵan azamattar shyǵa bastady. Bul ózgerister ásirese jastar arasynda jumyssyzdyqtyń ósýine jol bermeý úshin keshendi sharalar qabyldaýdy talap etedi. Sondyqtan halyqty jumyspen qamtý boıynsha jumys birneshe baǵyt boıynsha júrgizilýde, bul qoldaý kórsetý aýqymyn keńeıtýge múmkindik beredi», dep bólisti Asqar Nııazov.
Máselen, Memleket basshysy Qasym-Jomart Toqaevtyń tapsyrmasyna sáıkes Qazaqstanda árbir 10 myń adamǵa 100 jumys ornyn qurý boıynsha jumys júrgizilýde, sondaı-aq elimizde 10 ulttyq joba iske asyrylýda, azamattardy eńbegi artyq óńirlerden eńbek tapshylyǵy bar óńirlerge kóshirýge járdemdesý sharalary kórsetilýde.
«Osynyń arqasynda 900 myńnan astam adam jumysqa ornalasty. Onyń ishinde 28,8% – Ulttyq jobalar sheńberinde, 37,1% – «árbir 10 myń turǵynǵa 100 jumys orny» baǵytynyń arqasynda jáne 34% - jumys berýshiler usynǵan bos jumys oryndaryna turdy. Bul rette aı saıynǵy zeınetaqy aýdarymdary azamattardyń 81%-y úshin júzege asyrylady», dep qorytyndylady Asqar Nııazov.
Sonymen qatar, otyrysta «Memlekettik annýıtettik kompanııa «О́mirdi saqtandyrý kompanııasy» AQ jáne «Áleýmettik ońaltýdy damytýdyń ǵylymı-praktıkalyq ortalyǵy» AQ vedomstvolyq baǵynysty uıymdaryn damytý josparlary, sondaı-aq sybaılas jemqorlyqqa qarsy is-qımyl jáne qyzmetkerlerdiń qyzmettik ádep normalaryn saqtaýy jónindegi vedomstvo jumysynyń nátıjeleri qaraldy.