Bul týraly Memleket basshysy Parlament Senatynyń otyrysynda aıtty, dep habarlaıdy Egemen.kz.
«Biz úshin bul ózgeristerdi jalpyulttyq dıalog arqyly júzege asyrý óte mańyzdy. Osy máselege baılanysty Parlamenttiń róli áldeqaıda joǵary bolmaq. Sondyqtan, kele jatqan Parlamenttik saılaýǵa men ózim Memleket basshysy retinde aıryqsha mán berip otyrmyn. Bul saılaý elimizdiń zańyna sáıkes ádil jáne ashyq ótýge tıis. Jalpy biz azamattyq qoǵamnyń bedelin arttyrýymyz kerek», dedi Memleket basshysy.
Onyń aıtýynsha, azamattardyń laıyqty belsendiligi bolmasa, elimiz ozyq bolmaıdy.
«Azamattarymyz, eń aldymen, elimizdiń aldynda jaýapty bolýǵa tıis. Qoǵamda zań birinshi orynda turýy kerek. Zańnyń ústemdigi jáne qoǵamdaǵy tártip – elimizdiń turaqtylyǵynyń kepili. Turaqtylyq bolmasa, Qazaqstan oıdaǵydaı ilgeri basa almaıdy. Aımaqtaǵy basty rólin atqara almaıdy. Negizgi maqsatymyz – Ádiletti Qazaqstandy qurý», dedi Prezıdent.