Astana qalalyq máslıhat hatshysy Erlan Kanalımov pen máslıhat depýtattary jáne Bilim basqarmasynyń basshysy Qasymhan Senǵazyev qaladaǵy №2 psıhologııalyq-pedagogıkalyq túzeý kabıneti men №1 arnaıy mektep-ınternatyna baryp, búldirshinderdi kele jatqan Jańa jyl merekesimen quttyqtady, dep habarlaıdy Egemen.kz elorda ákimdiginiń resmı saıtyna silteme jasap.
Aldymen №2 psıhologııalyq-pedagogıkalyq túzeý kabınetinde ótken shyrsha toıynda dástúrli túrde ortaǵa Aıaz ata men Aqshaqar shaqyryldy. Ártúrli ertegi keıipkerlerine uqsap kıingen balalar Aıaz ataǵa taqpaq aıtyp, tátti alýǵa asyqty. Izinshe mýlfılm keıipkerleri ortaǵa shyǵyp, balalarmen birge bıleı ketti. Shyrsha shamdary jaǵylyp, merekeni asyǵa kútken balalar óz ónerlerin kórsetti.
Astana qalalyq máslıhat hatshysy Erlan Kanalımov balalardy kele jatqan merekemen quttyqtap, erekshe balalarǵa ýaqytyly jaǵdaı jasaý basty mindet ekenin atap ótti.
«Jańa jyl qarsańynda balalardyń shyrsha toıyna qatysyp otyrǵanyma óte qýanyshtymyn. Bul balalar asyǵa kútetin mereke dep aıtsaq bolady. Balalardan bólek úlkender de jańa jylǵa óz maqsatyn josparlap jatady. Jańa jylda ár balaǵa baqytty balalyq shaq tileımin. Densaýlyqtaryńyz myqty bolyp, árqashan kúlip-oınap júre berińizder. Osy oraıda ózimizben birge tátti syılyqtar alyp kelgenimizdi aıta óteıin. Jańa jylda ár balanyń armany oryndalsyn degim keledi.
Jalpy bizdiń qalamyzda erekshe kútim men jaǵdaıdy qajet etetinin 16 myńǵa jýyq bala bar. Olarǵa ýaqytyly jaǵdaı jasaý bizdiń basty mindetimiz», dedi Erlan Kanalımov.
Aıta keteıik, №2 psıhologııalyq-pedagogıkalyq túzeý kabıneti 0-18 jas aralyǵyndaǵy ártúrli dertke shaldyqqan 280 balaǵa tegin kómek kórsetedi. 2014 jyly ashylǵan mekemede pedagog-psıholog, defektolog, logoped jáne LFK mamandary bar. Olar eki aýysym boıynsha jáne ár balanyń dıagnozyna baılanysty jumys isteıdi.
Balalardy Jańa jyl merekesimen quttyqtaý №1 arnaıy mektep-ınternatynda jalǵasty. Shyrsha toıynda qalalaq Bilim basqarmasynyń basshysy Qasymhan Senǵazyev tárbıelenýshi balalardy keremet tosyn syı men táttige toly merekemen quttyqtady.
«Jańa jyl eń aldymen balalar men búldirshinderge qýanysh syılaıtyn mereke. Tátti syılyqtar balalardyń kóńil kúıin kóteredi. Bastysy myqty densaýlyq tileımin, árqashan ata-analary men ata-ájeleriniń kóz qýanyshy bolyp júre berińder. Biz Jańa jyl merekesine oraı ártúrli is-sharalardy uıymdastyryp kelemiz. О́tken demalysta Prezıdent jáne qala ákiminiń shyrsha toıyn ótkizdik. Biz qashan da erekshe bilim alýdy qajet etitin balalarǵa basty nazar qoıyp kelemiz. Qalalyq máslıhat depýttary qoldaýymen biz áli de arnaıy mektepterge baryp, balalardy quttyqtaıtyn bolamyz», dedi Qasymhan Senǵazyev.
Shyrsha toıynda qalalyq máslıhat hatshysy men depýttar balaqaılarǵa merekelik tátti syılyqtar tabystap, estelikke sýretke tústi.
Bıyl arnaıy mektep oqýshylary úshin birqatar mádenı-buqaralyq is-shara uıymdastyrylǵanyn atap ótken jón. Atap aıtqanda, oıyn-saýyq ortalyqtary men kınoteatrǵa tegin barý, qala ákimi men aýdan ákimderiniń atynan ótken shyrshalarǵa qatysý.
Esterińizge sala keteıik, 25 jeltoqsanda elordada Memleket basshysynyń atynan shyrsha merekesi ótkizilgen bolatyn. Merekege jetim balalar, ata-anasynyń qamqorlyǵynsyz qalǵan, erekshe qajettilikteri bar balalar, áleýmettik az qamtylǵan jáne kópbalaly otbasylardan shyqqan, daryndy jáne oqýda, sportta, shyǵarmashylyqta jáne t.b. jetistikterge jetken 200 bala shaqyryldy.