Qazaqstan Qarýly kúshterinde mamandyq boıynsha daıyndyq sabaqtary aıaqtaldy. Ár oqý kezeńiniń basynda ótkiziletin bul shara jaýyngerlik daıyndyq baǵdarlamasynyń negizgi kezeńi sanalady, dep habarlaıdy Egemen.kz.
Mamandyq boıynsha daıyndyq áskerı qyzmetshilerdiń laýazymdyq mindetine sáıkes oqýdan ótetin sabaqtar keshenin qamtıdy. Ol áskerı-eseptik mamandyqty, urysqa qajetti daǵdylardy, sondaı-aq qarý-jaraqpen jáne áskerı tehnıkamen saýatty jumys isteýdi ıgerýge negizdelgen.
Áskerı bólimderde jeke daıyndyqtar shtattyq-laýazymdyq mindetine sáıkes tájirıbeli nusqaýshylardyń basshylyǵymen júzege asyryldy. Sabaqtar oqý-ádistemelik jáne kórneki quraldardy paıdalana otyryp, qarý-jaraq pen áskerı tehnıkada, oqý synyptary men polıgondarda ótkizildi.
Mehanık-júrgizýshilerdi, kózdeýshi-operatorlardy, pýlemetshilerdi, granata atqyshtardy, órt sóndirýshilerdi jáne bólimshelerdiń jaýyngerlik daıyndyǵyn anyqtaıtyn basqa da mamandardy daıarlaý maqsatymen jeke toptar quryldy.
Bólimshe komandırleri urysty uıymdastyrý, atysty basqarý, qarýdy qalypty urysqa keltirý jáne jaýyngerlik daıarlyq pánderi boıynsha sabaqtar ótkizý ádistemesin pysyqtady.
Jaýyngerlik daıarlyqtyń barlyq pánderinen praktıkalyq daǵdylardy jetildirýge, shtattyq qarý-jaraq pen áskerı tehnıkany qoldanýǵa, ádistemelik bilimdi arttyrýǵa jáne qatań jarǵylyq tártipti saqtaýǵa erekshe nazar aýdaryldy.
Oqý aıaqtalǵan soń áskerı qyzmetshiler synaqtar men emtıhandar tapsyryp, nátıjesine sáıkes shtattyq tehnıkamen jáne qarý-jaraqpen jumys isteýge ruqsat beriledi.
Jaýyngerlik daıyndyqtyń kelesi kezeńi jaýyngerlik mindetterdi oryndaý kezinde bólimshelerdiń, bólimderdiń, quramalardyń jáne basqarý organdarynyń birlesken is-qımyldaryn úılestirý júzege aspaq.