Jambyl oblysy Sarysý aýdanynyń ákimshilik ortalyǵy - Jańatasta tótenshe jaǵdaıdyń saldaryn joıý boıynsha júıeli jumys júrgizilip jatyr. Qaladaǵy turǵyn úılerge jylý berile bastady, dep habarlaıdy Egemen.kz oblys ákiminiń baspasóz qyzmetine silteme jasap.
Jambyl oblysynyń ákimi Nurjan Nurjigitov Sarysý aýdanyna sapary barysynda jaýapty tulǵalarǵa elektr energııasy men jylý berý máselelerin jedel sheshýdi tapsyrdy.
«Atqarylǵan jumystardyń nátıjesinde elektr qýaty qaıta berile bastady, endi jylýmen jabdyqtaý sharalary júzege asyrylyp jatyr», delingen ákimdik habarlamasynda.
Qazirgi ýaqytta «JańataSýJylý» MKK sýmen jáne jylýmen jabdyqtaý júıesin toltyra bastady, aınalym sorǵylarynyń qyzmetin qalypqa keltirý jumystary da júrgizilip jatyr. Qalanyń jylýmen jabdyqtaý júıesin kezeń-kezeńimen iske qosý jáne barlyq úılerdi bir táýlik ishinde jylytýǵa tolyq qosý josparlanǵan.
Eske sala ketsek, 3 qańtarda qatty jeldiń saldarynan Jańatasta elektr baǵanalary qulap qalǵan. Bul elektr jelilerinde tıisti kerneýdiń taralýyna kedergi keltirdi. Nátıjesinde jylýmen jabdyqtaý júıesinen sýdy aǵyzý týraly sheshim qabyldandy. Qala jaryq pen jylýsyz qaldy, óńirde tabıǵı tótenshe jaǵdaı rejımi engizildi.