Jambyl oblysynda qant qyzylshasyn ósirý jumystary sońǵy birneshe jyldyń bederinde jandana tústi. Qaıbir jyldary toqyrap qalǵan tirliktiń tamyryna qan júgirdi. Sharýalar memleket tarapynan kórsetilip jatqan qoldaý arqyly jumystyń shıraı túskenin joqqa shyǵarmaıdy.
Byltyr jergilikti sharýa qojalyqtarynyń ıeleri 5,5 myń gektarǵa baltamyr otyrǵyzǵan bolatyn. Barlyq alqaptan 173,1 myń tonna tátti túbir jınaldy. 2021 jylmen salystyrǵanda ónim kólemi 45,8 myń tonnaǵa artqan. Al ár gektardan ortasha eseppen 415,7 sentnerden ónim alynǵan.
«Jalpy alǵanda, Memleket tarapynan kórsetilip otyrǵan qoldaý nátıjesinde bıyl qant qyzylshasy alqabyn 10 myń gektarǵa deıin jetkizý josparlanǵan. Sol mejege jetýdi basty maqsat sanap otyrmyz. Budan bólek óńirdiń sýarmaly jerleriniń kólemi 179,2 myń gektardy quraıdy. Onyń 55,2 myń gektary tıisti normatıvterge sáıkes sýmen qamtamasyz etilse, 47 myń gektar alqap 30-40 paıyz deńgeıde qamtylǵan (qalǵan 77 myń gekter jer tálimdik alqap retinde paıdalanylýda).
Halyqaralyq qarjy ınstıtýttary arqyly 35 mlrd teńge qarjy bólinip (13,9 mlrd teńge ıgerildi), 25 myń gektar sýarmaly alqap qalpyna keltirildi.
2022-2024 jyldary 306 sý nysanyna jóndeý jumystaryn júrgizip, 55 myń gektar alqapty aınalymǵa qosý kózdelgen. Bıyldyń ónimi úshin kúzgi dala jumystaryn júrgizýge 10 725 tonna arzandatylǵan dızel otyny bólindi.
Jalpy, óńirde kúzgi dala jumystaryn qalypty yrǵaqpen júrgizýge, qant qyzylshasy alqabyn ulǵaıtýǵa aıryqsha nazar aýdarylyp otyrǵanyn aıta ketken jón», dedi óńir basshysynyń orynbasary Qanatbek Mádibek.
Qant qyzylshasyn egýdi kásibine aınaldyrǵan sharýalar da jumys qarqynyn údete túsýge nıetti sekildi.
«Qant qyzylshasyn ósirý – sharýalar úshin óte paıdaly ári tabysty is. Neǵurlym erte ekseń, ónim soǵurlym mol bolady. Bul daqyl túri 5 gradýs sýyqqa deıin tózimdi. Onyń ústine qant qyzylshasyn ósirýshilerge memleketten jan-jaqty qoldaý kórsetiledi. Byltyr 900 gektarǵa baltamyr egip, ár gektarynan 600 sentnerden ónim aldyq. Bıyl egis kólemin ulǵaıtýdy kózdep otyrǵan jaıymyz bar», dedi «Qyzylsha jer» JShS bas dırektory Amangeldi Aıaǵanov.
Derekterge súıensek, oblys boıynsha jınalǵan ónimniń 117,1 myń tonnasy qant zaýytyna ótkizilip, odan 11,1 myń tonna qant óndirildi.
2022 jyly qant qyzylshasyna beriletin qoldaý kólemi tonnasyna 30 myń teńgeni qurasa, onyń 15 myń teńgesi qant zaýytynan, qalǵan 15 myń teńgesi memleket tarapynan tólendi. 80 sharýashylyqqa 1 504,3 mln teńge sýbsıdııa berildi. Al 2023 jyly qant qyzylshasyna beriletin memlekettik qoldaý 40 myń teńgege jetedi. Iаǵnı qant zaýyttary tóleıtin soma – 15 myń teńge, memlekettiń qoldaý qarjysy 25 myń teńgeni quraıdy.
Sharýa qojalyqtarynyń jetekshileri ár gektardan 800 sentnerge deıin ónim alatyn jańa tehnologııalardy qoldansa, qant zaýyttary jumysty durys uıymdastyryp otyrǵan barlyq sharýanyń 65-70 paıyzyn tuqymmen qamtamasyz etedi. Qant qyzylshasy alqabynyń kólemin arttyrýdyń mańyzy zor. Bul óńirdi shıkizatpen tolyq qamtýǵa mol múmkindik beredi. О́z kezeginde shet memleketterge táýeldilikti joıýǵa da sep bolmaq.
Jambyl oblysy