Byltyr Túrkistan oblysynda Balalar jylyn kózdelgen maqsatyna saı ótkizý úshin atqarylar is-sharalar 7 baǵytta josparlanyp, 5,2 mlrd teńge qaraldy. Jyl boıy irgeli de ıgilikti 83 is-shara iske asyryldy.
Balalar jyly aıasynda «Dara» qorynyń qoldaýymen Maqtaaral, Saryaǵash, Ordabasy aýdandarynda túzetý kabınetteriniń fılıaldary ashylyp, oǵan qor tarapynan 12 mln teńge qarajat bólingen. Nátıjesinde, erekshe bilim berýdi qajet etetin balalarǵa tıisti korreksııalyq jumystar kórsetý sapasy jaqsardy. Sonymen qatar 11 aıda oblystyq densaýlyq saqtaý mekemelerinde 9 845 bala ońaltý emin, 3 892 bala saýyqtyrý emin qabyldaǵan. Respýblıkalyq ońaltý ortalyqtarynda 507 bala em alǵan. Oblystaǵy 38 qosymsha bilim berý mekemelerinde – 28 500 oqýshy, mekteptegi úıirmelerde 355 600 oqýshy qosymsha bilimmen qamtylyp, qamtý kórsetkishi 70,1% (384 100 oqýshy) boldy. Al Qazyǵurt aýdanynda 120 balaǵa arnalǵan, Keles aýdanynda 320 balaǵa jáne Saıram aýdanynda 300 oqýshyǵa arnalǵan jańa oqýshylar úıi ashyldy. Túlkibas aýdany 150 balaǵa arnalǵan «О́ner» mektebi, Túrkistan qalasynda oqýshylardy shyǵarmashylyqqa úıretetin zamanaýı tehnıkamen jabdyqtalǵan «Fablab» sheberhanasy ashyldy. Kentaý, Arys, Tólebı aýdandarynda dál osyndaı sheberhanalar iske qosylmaq. Sondaı-aq respýblıkalyq «Ulttyq mektep lıgasy» jarysynda oblys oqýshylary 11 altyn, 9 kúmis, 7 qola medalǵa qol jetkizip, jalpykomandalyq esepte eki jyl qatarynan I orynǵa ıe boldy. Oblysta mektepke deıingi bilimmen qamtý – 92,9%. Balalar jylyn jáne 1 maýsym – Halyqaralyq balalardy qorǵaý kúni merekesin oblys kóleminde joǵary deńgeıde ótkizý maqsatynda «turan-balafest» onkúndik festıvali ótkizildi.
Balalar jyly qorytyndylanǵan «Bári de balalar úshin» merekelik is-sharasynda osyndaı derekter keltirildi. «Kongress holl» kópsalaly kesheninde ótken jıynda oblys ákiminiń orynbasary Beısen Tájibaev quttyqtaý sóz sóılep, halyqaralyq olımpıadalar men baıqaýlardyń jeńimpazdaryna qurmet kórsetti. «Elimizdiń Prezıdenti Qasym-Jomart Toqaev 2022 jyldy Balalar jyly dep jarııalady. Mundaǵy maqsat – Qazaqstan boıynsha ózderińiz sııaqty talantty, daryndy balalarǵa qoldaý jasap, qoǵamdaǵy izgilikti adamdardyń qataryna qosý. Túrkistan oblysynda bul is-shara joǵary deńgeıde uıymdastyryldy. О́ńirimizde myńǵa jýyq mektepte 514 myń bala bilim alyp jatyr. Túrkistan – elimizdegi eń bala sany kóp óńir. Árbir besinshi sábı Túrkistan oblysynda dúnıege keledi. Byltyr óńirde 14 mektep paıdalanýǵa berildi. Aldaǵy ýaqytta da mektepter sany artady», dedi B.Tájibaev.
Saltanatty jıynda halyqaralyq olımpıadalar men baıqaýlarda jeńimpaz atanǵan 18 oqýshy baǵaly syılyqpen marapattaldy. Sonymen birge Balalar jyly aıasynda úzdik atanǵan Túrkistandaǵy oqýshylar saraıy men Qazyǵurt jáne Jetisaı aýdandaryna mıkroavtobýstyń sertıfıkattary tapsyryldy. Merekelik keshte oblystyń jas, oqýshy ónerpazdary men respýblıkaǵa tanymal estrada juldyzdary óner kórsetti.
Túrkistan oblysy