«О́skemen-Taýly Úlbi-Severnoe» ýchaskesinde kóshkinderdi túsirý jumystary júrgizildi, dep habarlaıdy Egemen.kz.
«Betkeılerden qar massalaryn túsirý jumystary júrgizilip jatyr. Aldyn alý is-sharalaryn júrgize otyryp, biz jaǵdaıdy turaqtandyramyz jáne sol arqyly turǵyndar men avtojoldar ýchaskeleri arqyly ótetin kólikterdiń qaýipsizdigin qamtamasyz etemiz. Barlyǵy 40500 tekshe metr qar tústi, al qys mezgili bastalǵaly beri barlyǵy 80000 tekshe metr qar túsirildi», dedi «Qazseldenqorǵaý» ShQ fılıalynyń basshysy Omar Dúzgimbaev.
Onyń aıtýynsha, «Qazseldenqorǵaý» fılıalynyń baqylaýshylary júrgizetin turaqty monıtorıng qaýipti ýchaskelerdi anyqtaýǵa múmkindik beredi. Monıtorıng qar jamylǵysynyń bıiktigin ólsheýdi, aýa men qardyń temperatýrasy men ylǵaldylyǵyn tirkeýdi, qar jamylǵysynyń tyǵyzdyǵyn anyqtaýdy qamtıdy.
Oblys boıynsha barlyǵy 325 oshaq 71 obektige qaýip tóndiredi, onyń ishinde 44 turǵyn úı, 93 km avtomobıl joldary bar (15 km - respýblıkalyq mańyzy bar joldar, 78 km - oblystyq mańyzy bar joldar). Eń qaýipti baǵyttar - О́skemen - Samar 95-102,132-137 km, О́skemen - Taýly Úlbi 30-37 km, О́skemen-Soltústik-Serebrıansk 58-65 km kóshkin qaýpi bar aımaqta 5 demalys bazasy bar. Olardyń ekeýi - Rıdder qalasynda, úsheýi - Taýly Úlbide ornalasqan.
«Oblysta kóshkin qaýpi bar. Bul ýaqytta taýly jerlerge shyqpaýǵa keńes beriledi. Qatty aıqaı men shý qar kóshkinin týdyrýy múmkin. Kólikte qar kóshkini qaýpi bar ýchaskeniń janynan ótip bara jatqanda toqtamaı, ótip ketý qajet. Tótenshe jaǵdaı kezinde 112 nómiri boıynsha habarlasý kerek», dep túsindirdi ShQO TJD bastyǵynyń orynbasary Arman Toqanov.
Qar kóshkini kezinde kelesideı áreket etý qajet:
Jartastyń, aǵashtyń artyna tyǵylýǵa tyrysyńyz, jerge jatyńyz, basyńyzdy qolyńyzben qorǵańyz; Kóshkinge tap bolǵan jaǵdaıda qardyń betinde qalý úshin júzý qımyldaryn jasańyz; Qarǵa batyp ketseńiz tizeńizdi asqazanǵa qaraı tartyńyz, qar kóshkini toqtaǵansha kútińiz, ústińgi jáne astyńǵy jaǵyńyzdy anyqtap, qardan shyǵýǵa tyrysyńyz.