Bıyl Almatyda 17 seısmıkalyq stansııa ornatý josparlanyp otyr. Bul týraly Premer-mınıstr Álıhan Smaıylovtyń Senat depýtattarynyń saýalyna bergen jaýabynda aıtylǵan, dep habarlaıdy Egemen.kz.
- Seısmıkalyq qaýipti óńirlerdegi joıqyn jer silkinisterine azamattyq qorǵaý júıesin daıyndaý maqsatynda 2021-2023 jyldarǵa arnalǵan Qazaqstan Respýblıkasynyń seısmıkalyq qaýipsizdigin qamtamasyz etý jónindegi jumystyń tıimdiligin arttyrý jónindegi sharalar kesheni bekitildi, - delingen Álıhan Smaıylovtyń jaýabynda.
Jol kartasyn iske asyrý sheńberinde múddeli memlekettik organdar kelesi jumystardy júrgizýi tıis: oblystardyń aýmaqtaryn egjeı-tegjeıli seısmıkalyq aýdandastyrý kartalarynyń jıyntyǵyn ázirleý; baqylaý stansııalaryn qura otyryp, seısmologııalyq baqylaý júıelerin damytý; jer silkinisi týraly erte habarlaýdyń avtomattandyrylǵan júıelerin engizý; jer silkinisi týyndaǵan jaǵdaıda materıaldyq resýrstar men qarjy rezervin qurý jóninde sharalar qabyldaý; halyq arasynda úgit-nasıhat jumystaryn júrgizý jáne personaldy, óndiristik, jarylys-órt qaýipti obektilerdiń personalyn oqytý.
Premer-mınıstr 2021 jyly «2021-2023 jyldarǵa arnalǵan qazirgi zamanǵy ǵylymı-ádistemelik negizde oblystar men qalalar aýmaqtarynyń seısmıkalyq qaýiptiligin baǵalaý» nysanaly qarjylandyrý baǵdarlamasy sheńberinde Shyǵys Qazaqstan oblysy úshin 10 seısmıkalyq stansııa satyp alynǵanyn túsindirdi. 2022 jyly baqylaý stansııalarynyń jelisin keńeıtý maqsatynda Almaty jáne Shyǵys Qazaqstan oblystarynyń aýmaqtarynda 8 seısmıkalyq stansııa ornatyldy.
«Sondaı-aq 2022 jyly Almaty qalasynda 11 stansııa ornatýǵa jergilikti bıýdjetten 547 mln teńge bólindi. Al 2023 jylǵa qaraı taǵy 17 stansııa ornatý josparlanyp otyr», dep jazdy Álıhan Smaıylov.