Qyzylordadaǵy «Bolashaq» ýnıversıteti elge úlgi, jastar unatatyn tulǵalardy óz tórine shaqyryp, stýdenttermen jolyqtyryp, suhbat quryp, erkin alań jasaý maqsatynda «Mártebeli meıman» jobasyn qolǵa aldy. Bul joly «Mártebeli meıman» retinde aqyn, dramatýrg Israıl Saparbaı shaqyrylypty. Aqyn men jastardyń ortasynda óleń men ómirdiń arasyndaǵy áńgimeniń barlyǵy qamtyldy.
Onan soń osy ýnıversıtet jastarynan quralǵan stýdentter teatrynyń tusaýy kesildi. Qanatqaqty qoıylym kórsetildi. Jastar Israıl Saparbaıdyń osydan 23 jyl buryn qoıylǵan «Aýyldan kelgen arý» degen pesasyn tańdap alypty. Oqýǵa túse almaı qalǵan qyzdyń taǵdyry qalanyń dańǵaza ómirine ulasyp, aldanyp, ár nársege arbalyp, aqyr aıaǵy júkti bolyp, ómirge náreste ákelip, ony tastap ketýmen aıaqtalady. Kúndelikti kúıbeń tirshilikte kezigetin oqıǵa. Ásirese, qalanyń qym-qýyt tirligine qyzyqqan aýyl balasyna tán qubylys. Mamandyqtary akterlikten alys bolsa da «Bolashaqtyń» stýdentteri qoıylymdy ádemi alyp shyqty. Kórermendi sendirdi. Kózge ystyq jas keltirdi. «Biz osy arqyly jastardy keri áreketterden, jaman qubylystardan saqtandyryǵymyz keldi. Jastarǵa oı salyp, oń jolmen júrýdi nasıhattamaq nıette boldyq», – deıdi ýnıversıtettiń negizin salýshy Baqbergen Dosmambetov.
Erjan BAITILES,
«Egemen Qazaqstan».
QYZYLORDA.