Qaraǵandy oblysy Nura aýdanynda ishimdik satpaıtyn ári ony tatyp almaıtyn aýyl bar. Bul aýyl Tikenekti atalady. Taǵy bir qyzyǵy, aýylda eki jylda birde-bir qylmys tirkelmegen. Ishimdik ataýly aýyldan alastalǵan eki jylda bireýdiń bireý ala jibin attap kórmepti. Aýylda 226 adam turady. Tikenekti elimiz boıynsha «Úlgili aýyl» atandy.
Aýyl turǵyndary qylmystyń aıylyn jııýyn ishimdikten bas tartýmen baılanystyrady. Mundaı tyıymǵa bastama bolǵan aýyl ákimi Erlan Ospanov pen ýchaskelik polısııa ınspektory Álibek Ospanov eken.
– Aýyl ákimi ekeýmiz osyndaı bastama kóterip edik, Qoǵamdyq keńestiń tóraǵasy qoldaý kórsetti. О́zimiz anyqtap, belgilep alǵan osy baǵytta jumysty jalǵastyramyz. Jastardyń qylmystan aýlaq bolýyn, salamatty ómir saltyn ustanýyn tileımiz, – dedi ýchaskelik ınspektor.
Tikenekti ózge aýyldarǵa úlgi kórseterine ınspektor senimdi.
Jaqynda Tikenekti aýylynyń ákimi Erlan Ospanov Ishki ister mınıstri Marat Ahmetjanovtyń qolynan «Tártipti qamtamasyz etýge qosqan úlesi úshin» medalin aldy. Al aýylda ınfraqurylymdarǵa jóndeý júrgizilip, áleýmettik-ekonomıkalyq áleýeti kóterilip keledi. Ortalyqtandyrylǵan aýyz sý júıesi tartylǵan. Internet jáne uıaly baılanys bar. Kósheleri jaryqtandyrylǵan.
Bıyl aýyldaǵy úsh kósheniń joldary ortasha jóndeýden ótpek. Taǵy 14 jaryq baǵanyn ornatý josparda. Mamyrda zamanaýı balalar oıyn kesheni boı kótermek, – dedi Nura aýdanynyń turǵyn úı-kommýnaldyq sharýashylyq, avtomobıl joldary jáne turǵyn úı ınspeksııasy bóliminiń basshysy Nurjan Oralbaev.
Qaraǵandy oblysy