Ishki ister mınıstrligi Qazaqstanǵa 2022 jyldyń 1 qyrkúıegine deıin ákelingen sheteldik avtomobılderdi birjolǵy zańdastyrýdyń bastalý kúnin atady, dep habarlaıdy Egemen.kz.
Qazaqstan Úkimetiniń «Qazaqstan Respýblıkasynyń aýmaǵyna 2022 jylǵy 1 qyrkúıekke deıin ákelingen kólik quraldarynyń jekelegen sanattaryn bastapqy tirkegeni úshin alym mólsherlemesin qoldaný qaǵıdalaryn, sharttary men merzimderin bekitý jáne osyndaı kólik quraldaryn ákelýdi júzege asyrǵan jeke tulǵalardy óndirýshilerdiń (ımporttaýshylardyń), sondaı-aq kólik quraldary sanattarynyń keńeıtilgen mindettemelerinen bosatý týraly» qaýlysy shyqty.
Ishki ister mınıstriniń orynbasary Igor Lepehanyń aıtýynsha, Úkimet 11 qańtarda sheteldik avtomobılderdi alǵashqy tirkegeni úshin alym mólsherlemesin qoldaný erejelerin, sharttary men merzimderin bekitti. Erejeler alǵashqy resmı jarııalanǵan kúninen keıin kúntizbelik 10 kún ótken soń qoldanysqa engiziledi.
«Erejeler búgin jarııalanǵanyn eskere otyryp, olar 2023 jyldyń 23 qańtarynda, dúısenbide kúshine enedi. Sol kúnnen bastap biz sheteldik avtokólikterdi zańdastyrýǵa kirisemiz», dedi Igor Lepeha brıfıng barysynda.
Qaýly negizinde 2022 jylǵy 1 qyrkúıekke deıin el aýmaǵyna ákelingen kólik quraldarynyń jekelegen sanattaryn bastapqy tirkegeni úshin alym mólsherlemesin qoldanýdyń jáne osyndaı kólik quraldaryn ákelýdi júzege asyrǵan jeke tulǵalardy ýtıl alym tóleýden bosatýdyń tártibi, sharttary men merzimderi aıqyndaldy.
Eger kólik quraldary:
1) Qazaqstan Respýblıkasynyń aýmaǵyna 2022 jylǵy 1 qyrkúıekke deıin ákelingen;
2) izdeýde joq;
3) basqa memlekettiń quzyretti organynda burynǵy tirkelgen jeri boıynsha memlekettik esepten shyǵarylǵan;
4) kedendik tazartýdan ótken bolsa, ıaǵnı osyndaı talaptarǵa sáıkes kelse, qaýlyǵa saı kólik quraldaryna bastapqy memlekettik tirkeý úshin 200 000 teńge mólsherinde alym mólsherlemesi qoldanylady.
Sheteldik avtomobılderdi bastapqy tirkeýdiń kórsetilgen tártibi 2023 jylǵy 1 shildege deıin qoldanysta bolady jáne M1, M1G, M2, M2G, N1, N1G sanattaryndaǵy kólik quraldaryna, onyń ishinde bastapqy memlekettik tirkeý Qazaqstan Respýblıkasynyń azamattarynda júzege asyrylatyn basqarý tetigi oń jaqta ornalasqan kólik quraldaryna qoldanylady. Bul rette kólik quraldaryn sanattar boıynsha jikteý Keden odaǵynyń «Dońǵalaqty kólik quraldarynyń qaýipsizdigi týraly» tehnıkalyq reglamentindegi (KO TR 018/2011) 1-qosymshaǵa sáıkes júzege asyrylady.