Fransııanyń Nıssa qalasynda kúres túrlerinen 1924 jyly Parıj Olımpıadasynyń jeńimpazy atanǵan ataqty balýan Anrı Deglandy eske túsirýge arnalǵan Gran-prı týrnıri aıaqtaldy.
Atalǵan jarysta Elmıra Syzdyqova tabysty óner kórsetti. Kezinde bul sportshymyz Azııa chempıonatynda alty (1 altyn+2 kúmis+3 qola) júldeni oljalap, Azııa oıyndarynda qola medaldi qorjynǵa saldy. 2016 jyly Brazılııanyń Rıo-de-Janeıro qalasynda alaýy tutanǵan Olımpııa oıyndarynda úshinshi orynǵa taban tiredi. Odan bólek, Syzdyqovanyń basqa asa iri halyqaralyq dodalarda jeńip alǵan júldeleri jeterlik. Biraq aýyr jaraqat alýyna baılanysty byltyr ol birde-bir jarysqa qatyspady. Esesine, bıylǵy maýsymdy ol jarqyn jeńispen bastady. Nıssadaǵy týrnırde barlyq qarsylasyn sypyra utqan Elmıra altyn medaldi moınynda jarqyratty.
Biz oǵan aldaǵy jarystarda da sáttilik tileımiz. Qazirgi kezde otandyq balýandar arasynan álemdik deńgeıdegi dodalarda jalǵyz Jámıla Baqbergenova ǵana júlde alyp júr. Endi Elmıra da sol bıikten kórinedi dep úmittenemiz.