Bokstan Bangkokta ótip jatqan jastar arasyndaǵy (U-22) Azııa chempıonaty márege jaqyndady. Dúısenbi kúni biz erler arasyndaǵy jartylaı fınaldyq saıystardy tamashaladyq. Sol keshte sharshy alańǵa shyqqan 11 jerlesimizdiń beseýi osy mejede súrinip, qola medaldi qanaǵat tutty. Al jeńiske jetken alty jigitimiz erteń chempıondyq ataq úshin talasady.
Aldymen jeńilistiń kermek dámin tatyp, óz jankúıerlerin jerge qaratqandar jaıynda áńgimeleıik. 60 kılo salmaqtaǵy Talǵat Syrymbetov Phýthanet Rodsýkti birinshi raýndta nokdaýnǵa jiberdi. Alaıda odan keıin Taılandtyń tastúlegi qarqynyn kúrt kúsheıtip, qandasymyzdy biraz ábigerge saldy. Talǵat ta aıanyp qalǵan joq. Desek te báseke aıaqtalǵannan keıin tóreshiler biraz oılana-tolǵana kele, jergilikti bylǵary qolǵap sheberiniń qolyn kóterdi. 63,5 kılodaǵy Muhammedsabyr Bazarbaıuly qansha tyryssa da, mońǵolııalyq Týlga Oıýnbaatardyń osal tusyn taba almady.
Eń sońǵy bolyp rıngke kóterilgen úsh boksshymyzdyń úsheýi de úlken synaqtarǵa áli de daıar emes ekenderinen baıqatty. Eń ókinishtisi, olardyń barlyǵy da О́zbekstannyń órenderinen utyldy. Atap aıtsaq, Erasyl Jaqpekov (80 kılo) Jasýrbek Iýldoshevke, Erhat Bekzat (92 kılo) Nýsratbek Tohırovqa, al Amanat Sabyrǵalı (+92 kılo) Jahongır Zokırovqa ese jiberdi. Osy jaıttyń ózi-aq qazirgi kezde qazaqtarǵa qaraǵanda ózbek boksynyń kóshi birshama ilgeri ekenin ańǵartsa kerek. Árıne, respýblıkalyq federasııanyń basshylary men ulttyq qurama bapkerleri bizdiń bul pikirimizdi teriske shyǵarýǵa tyrysatyny anyq. Biraq jartylaı fınalda Qazaqstan men О́zbekstannyń bylǵary qolǵap sheberleri ózara úsh ret kezdesip, bul básekelerdiń barlyǵy «ala taqııalylardyń» jeńisimen aıaqtalǵanyn olar qalaı túsindirer eken? Sonyń aldynda ǵana dál osy mejede ózbektiń burymdylary qazaqtyń úsh qyzyn ońdyrmaı sabap tastaǵany taǵy bar. Soǵan qalaı namystanbaısyń?! Elge kelgen soń bizdiń «maıtalmandar» ádettegideı barlyq kináni tóreshilerge artyp, ózderin aqtap alýǵa tyrysa ma? Álde bul joly basqa ýáj aıta ma? Osyndaı sansyz saýaldardyń jaýabyn sanaýly kúnderden keıin Qazaqstannyń jastar quramasy Taı eli saparynan oralǵannan keıin biletin bolamyz.
Jartylaı fınalda qarsylastaryn qapy qaldyryp, fınalǵa shyqqan alty jigitke alǵystan basqa aıtarymyz joq. 48 kılo salmaq dárejesindegi Sanjar Táshkenbaı Natthaphong Thýamcharoendi tize búktirdi. Tóreshiler rıng qojaıynyna bolysqylary kelgenimen, qazaq boksshysyna kıligýge esh ilik tappady. Bul jekpe-jekte Sanjar kúmánsiz jeńiske jetti. 54 kılodaǵy Nursultan Altynbek qyrǵyzstandyq Islam Torobaevtan basym tússe, 57 kılodaǵy Mahmud Sabyrhan fılıppındik Djerıcho Akaılardy esh qınalmaı eńserdi. 67 kılo salmaqtaǵy Abzal Serik Penh Vanthýngpen kúsh synasty. Qandasymyzdyń sheberlik deńgeıi Kambodjanyń ókilinen áldeqaıda joǵary ekeni birden baıqaldy. Abzal ony aldap ta, arbap ta urdy. Úshinshi raýndta bir ret eseńgiretip te aldy.
71 kılo salmaqtaǵy Sabyrjan Aqqalyqovtyń tájikstandyq Dovýd Mahkamovty jeńetinine eshkimniń kúmáni bolǵan joq. Jastar arasynda álem chempıony degen ataǵy bar qazaq boksshysy eresekter dýyna da erkin qosylyp, biraz ýaqyttan beri óreli ónerimen kózge túsip júr. Jartylaı fınalda ol qarsylasyn san soqtyrdy. 75 kılodaǵy Dıas Moljigitovtiń qytaılyq Aılıkýtı Kahaerden mysy basym boldy.
Jartylaı fınalǵa deıin jetken boksshylardyń sany boıynsha Qazaqstan men О́zbekstan ózgelerden kóshi ilgeri tur. Olardyń árqaısysynyń 11 óreni jeńis tuǵyryna kóterildi. Úshinshi orynda – Qyrǵyzstan. Qyrǵyzdyń jeti sportshysy dál sondaı qurmetke bólendi. Sondaı-aq osy mejede óner kórsetken basqa memleket ókilderiniń sany mynadaı: Taıland pen Fılıppın – 4, Mońǵolııa, Tájikstan, Qytaı – 3, Indonezııa men Kambodja – 2 jáne Malaızııa men Nepal – 1. Endi solardyń arasynan kimderdiń ozyp shyǵyp, Azııa chempıony atanatynyn 26 qańtarda biletin bolamyz. Al qyzdardyń fınaldyq saıysy búgin ótedi.
Erteń ótetin aqtyq synda Sanjar Táshkenbaı Shodıerjon Melkýzıevpen, Abzal Serik Bekzod Hamıdovpen, Sabyrjan Aqqalyqov Nýrıslam Ismoılovpen jáne Dıas Moljigitov Alohon Abdýllaevpen aıqasady. Bul boksshylardyń barlyǵy da – О́zbekstannan. Iаǵnı kórshiles qos memlekettiń ózara «qaqtyǵysy» qaıta jalǵasatyn bolady. Osy joly jigitterimiz namysqa tyrysady dep úmittenemiz. Al Nursultan Altynbek fılıppındik Flınt Djaramen judyryqtassa, Mahmut Sabyrhan taılandtyq Saravýt Sýkthetpen saıysqa túsedi.