Byltyrǵy qyrkúıek aıynda meksıkalyq Saýl Alvaresten upaı sanymen utylǵannan keıin Qazaqstannyń ataqty kásipqoı boksshysy Gennadıı Golovkın sharshy alańǵa shyqqan joq. Sol aralyqta birneshe gúrzi judyryqty jigitter ony jekpe-jekke shaqyrdy. О́ıtkeni, «Kanelodan» jeńilgenimen, orta salmaqtaǵy WBA men IBF sekildi beldi nusqalardyń chempıonyq belbeýi áli dejerlesimizge tıesili. Solardyń biri Krıs Iýbenk edi.
33 jastaǵy Ulybrıtanııanyń Shyǵys Sýsseks óńiriniń týmasy 2011 jyldan beri kásipqoı rıngte kúsh synasyp júr. Sol aralyqta 35 kezdesý ótkizip, 32 ret jeńiske jetti. 23 qarsylasyn nokaýtqa jiberdi. 2017-2020 jyldar aralyǵynda Iýbenk ekinshi orta salmaqta IBF nusqasynyń altyn belbeýin ıelenip, WBA-nyń ýaqytsha chempıony atandy. Buǵan deıin ol Bıllı Djo Sonders (2014 jyly) pen Djordj Groývzden (2018 jyly) upaı sanymen ǵana utylǵan edi. Taǵy bir básekede teń esep tirkeldi. Keııngi alty jekpe-jegin Krıs jeńispen aıaqtady. Sol aralyqta Djeı-Djeı Makdonah, Djeıms Dıgeıl, Matveı Korobov, Markýs Morrıson, Vanık Avdııan jáne Lıam Ýılıams syndy sańlaqtardy san soqtyrdy. Mine, sol kezderi Iýbenk GGG-dy qaıta-qaıta jekpe-jekke shaqyryp, álek bolǵan edi.
Biraq bul básekeniń endi ótpeıtini anyq. Sebebi jýyrda ǵana Krıs Iýbenk óziniń otandasy Lıam Smıtten oısyraı utyldy. Ulybrıtanııanyń Manchester qalasynda ótken bul báseke tórtinshi raýnda tehnıkılyq nokaýtpen aıaqtaldy. Endi Golovkınniń Smıtpen kúsh synsýy ábden múmkin. О́ıtkeni 34 jastaǵy Lıverpýldiń týmasy qazir babynda. Kásipqoı boksty serik etken 15 jyl aralyǵynda ol 37 márte jekpe-jekke shyǵyp, 33 ret mereıi ústem boldy. 20 básekelesin aıqyn basymdyqpen utty. Lıam tek Saýl Alvares (2016), Haıme Mýngııa (2018) jáne Magomed Kýrbanovqa (2021) ese jiberdi. Al qalǵan qarsylastaryn «qalpaqpen uryp aldy» desek te bolady.
Osylaı tizbekteıtin bolsaq, amerıkalyq Djermall Charlo, kýbalyq Erıslandı Lara, domınıkandyq Karlos Adames jáne meksıkalyq Haıme Mýngııa da GGG-men qolǵap túıistirýge daıar ekenin ańǵarý qıyn emes. Olardyń barlyǵy da myqty boksshylar. Máselen, 32 jastaǵy Charlo WBC nusqasynyń altyn belbeýiniń ıegeri. Jasy 40-qa taıap qalǵan Lara men 28 jastaǵy domınıkandyq Karlos Adames ýaqytsha chempıondyq ataqtardy ıelenýde. Al 26 jastaǵy Mýngııa 41 jekpe-jektiń birde-bireýinde jeńilistiń kermek dámin tatqan emes. Sol básekelerdiń 33-inde ol qarsylastaryn uryp jyqty.
Árıne, Gennadıı Golovkınniń olardyń eshqaısysynan qaımyqpaıtyny anyq. Desek te onıń da dáýiri ótip bara jatqanyn moıyndamasqa laj joq. Bıyl kóktemde 41 jasqa tolǵaly otyrǵan otandasymyz aldaǵy ýaqytta jaqsy eki-úsh jekpe-jek ótkizip, jarqyn jeńisterimen óz jerlesterin qýantsa degen tilegimiz bar. Kezinde «Ákem – orys, sheshem – káris, al men – qazaqpyn!» dep jer-jahanǵa jar salǵan Genaǵa barsha qazaq jankúıeriniń syı-qurmeti erekshe jáne alǵysy sheksiz. Bir sózben aıtsaq, GGG-dyń esimi Qazaqstannyń kásipqoı boksyn jańa deńgeıge kótergen azamat retinde tarıhta qalatyny sózsiz.