Almatyda erekshe qajettilikteri bar balalardy tárbıelep otyrǵan analarǵa jeke kásibin ashýǵa múmkindik týdy, dep habarlaıdy Egemen.kz.
Almaty qalasynyń isker áıelder qaýymdastyǵy «MamaPro» qoǵamdyq qory jáne «ICF-Kazakhstan» qoǵamdyq birlestigimen erekshe balasy bar analarǵa arnalǵan «Áıelder – áıelderge» áleýmettik jobasyn bastady. Irikteýden ótken 22 áıel aldaǵy ýaqytta mentorlar men koýchtardyń kómegimen arnaıy biliktilik kýrstarynan ótip, jeke kásibin dóńgeletip áketpekshi.
О́tken jyldyń jeltoqsan aıynda irikteýden ótip, osy jylǵy qańtar men sáýir aralyǵynda mentorlyq jetekshilik pen koýchıngten ótetin bolashaq kásip ıeleri buǵan deıingi kezeńde kásipkerliktiń álippesin tanyp, psıhologııalyq qoldaýdan ótti. Kásibı mamandar sonymen qatar analar úshin arnaıy sheberlik saǵattaryn da ótkizedi.
Joba aıasynda analar óz kásibin ashýmen qatar, jumysqa da ornalasa alady. Almaty qalasy Isker áıelder qaýymdastyǵynyń tóraıymy Natalıa Muhamedjanova atap ótkendeı, qoǵamdaǵy áleýmettik máseleler jumyla birikkende ǵana sheshimin tabady. Al ınklıýzııa salasynda birlesip atqaratyn sharýa jetkilikti. Bul joba analardyń kásip ashýyna qoldaý kórsete otyryp, otbasynyń áleýmettik salmaǵyn jeńildetýge baǵyttalyp otyr.
Áleýmettik jobanyń demeýshisi Almaty menedjment ýnıversıteti ǵımaratynda jobaǵa qatysty birqatar sharalar ótetin bolady. «MamaPro» qoǵamdyq qory tarapynan analarǵa kásipkerliktiń negizderi, psıhologııalyq kómek kórsetilse, qalalyq Isker áıelder qaýymdastyǵy mentorıng, sheberlik sabaqtar men quqyqtyq qoldaý jasaı otyryp, úsh kandıdatty jumyspen qamtýǵa yqpal etedi. «ICF-Kazakhstan» QQ erekshe balasy bar analarǵa koýchıng-sessııalar ótkizedi.
Jıyn barysynda irikteýden ótken analar óz basynan ótken qıyn jaǵdaılar týraly baıandap, jańa jobanyń erekshe qajettilikteri bar balalardyń otbasy úshin úlken qoldaý ekenin atap ótti.
ALMATY