Qarjy jáne bıýdjet komıtetiniń depýtattary salyq-bıýdjet salasyndaǵy ashyqtyqty baǵalaý jónindegi máselelerdi Halyqaralyq valıýta qorynyń ókilderimen birge talqylady, dep habarlaıdy Egemen.kz Senattyń baspasóz qyzmetine silteme jasap.
Komıtet tóraǵasy Sultanbek Mákejanov zań shyǵarýshy bıliktiń bıýdjettik proseske qatysty ókilettikteri men mindetteri qalaı oryndalatyny týraly kezdesýge qatysýshylarǵa aıtyp berdi.
«Parlament Senatynyń basym bóligi elimizdegi qazirgi kezdegi 20 ákimshilik-aýmaqtyq birlik ókilderinen jasaqtaldy. Sondyqtan da senatorlar óz qyzmetinde ózderi saılanǵan aımaqtyń atynan da sóz alady. Depýtattar óz óńiriniń problemalaryn, jergilikti turǵyndardyń suranystaryn jetik biledi jáne óńirler ókilderimen birlese otyryp ózókilettikteri aıasynda máselelerdi tıisti salalyq mınıstrlikterde sheshýge atsalysady. Ol árıne, qarjylandyrý máselelerine tikeleı qatysty», dedi senator Makejanov.
Senator Bekbolat Orynbekov talqylaý barysynda Senatta respýblıkalyq bıýdjetti qaraý barysynda ony qalyptastyrýǵa depýtattardyń tikeleı yqpal etý múmkindigi bar ekendigine HVQ ókilderiniń nazaryn aýdardy.
HVQ tobynyń basshysy óz kezeginde kapıtaldy elden shyǵarý jáne olardy zańdy ıesine qaıtarý faktilerin anyqtaý tetikteri, sondaı-aq basqa eldermen salystyrǵanda qazaqstandyq salyq jáne bıýdjet kodeksteriniń artyqshylyqtary men kemshilikteri týraly depýtattarǵa aıtyp berdi.
Sultanbek Mákejanov kezdesýdi qorytyndylaı kelip, depýtattar osy saladaǵy ashyq yntymaqtastyqqa árqashan daıyn ekenin atap ótti.