Almatynyń tórt aýdanynda sý jelileriniń tozyǵy jetken, dep habarlaıdy Egemen.kz.
«Qaladaǵy sý qubyry jáne káriz jelileriniń tozýy - 55-58 paıyz shamasynda. Eski aýdandarda jelilerdiń tozýy áldeqaıda kóp - shamamen 80%, 1965 jyldan 1985 jylǵa deıin salynǵan eski jeliler bar. Biraq qazir bizde apat deńgeıi tómen, jóndeýge ýaqyt bar. Bıylǵy jyly «Almaty Sýdyń» ınvestısııalyq baǵdarlamasy ótken jylǵymen birdeı - sýmen jabdyqtaý jelilerine 2,6 mlrd teńge jáne káriz jelilerine 1 mlrd teńgege jýyq qarajat qarastyrylǵan», dedi Almaty memlekettik kásipornynyń bas dırektory Ilııas Qazıev.
Ol bıyl jóndeý jumystary negizinen jelilerdiń tozyǵy jetken Medeý, Túrksib, Jetisý jáne Almaly óńirlerinde júrgiziletinin aıtty.
Baıandamashy profılaktıkalyq jumystardy eskere otyryp, ınjenerlik jelilerde kúrdeli apattar bolmaýy kerek dep jaýap berdi. Onyń aıtýynsha, qaladaǵy barlyq jelilerge qyzmet kórsetiledi.
«Almaty sý» mekemesiniń málimetinshe, qazirgi tańda qaladaǵy sý qubyry jelileriniń tozýy 54,2 paıyzdy qurap otyr, tıisinshe 1943 shaqyrym sý qubyry jelileri aýystyrýdy qajet etedi. Bul rette kanalızasııanyń tozýy 56,6% quraıdy, ıaǵnı 1000 shaqyrymnan astamy qaıta qurýdy qajet etedi.
«Almaty sý» memlekettik kommýnaldyq kásipornynyń resmı ókili Serik Shaǵyrov jańa bas jospar jobasynda 2030 jylǵa deıin 900 shaqyrym, 2040 jylǵa deıin 1500 shaqyrym jelini salý jáne qaıta jańǵyrtý kózdelgenin qosyp aıtty.
«Tozý qarqynyn tómendetý úshin jyl saıyn keminde 104 shaqyrym sý qubyry jelisin jáne 73 shaqyrym káriz jelisin qaıta jańǵyrtý qajet. Biraq bizdiń qoldanystaǵy ınvestısııalyq baǵdarlamamyz jylyna nebári 20-25 shaqyrym qubyrdy qaıta jańǵyrtýǵa múmkindik beredi», dedi ol.