Qurlyqtyq hokkeı lıgasyndaǵy (QHL) kezekti týr oıynyn Astananyń «Barysy» Máskeýde áıgili SSKA klýbyna qarsy ótkizip, jeńiske jetti.
SSKA-nyń jarys kestesindegi jaǵdaıy jerlesterimizge qaraǵanda áldeqaıda jaqsy. 80 upaı jıǵan reseılikter Batys konferensııasynda úshinshi oryndy ıelenip tur. Al qorjynynda nebári 57 upaıy bar «Barys» Shyǵys konferensııasynda eń sońǵy 11-oryndy qanaǵat tutýda. Sonymen qatar áskerıler klýby byltyrǵy maýsymda Gagarın kýbogin oljalaǵanyn da aıta ketken abzal. Desek te bul joly bizdiń jigitter jankeshtiliktiń shynaıy úlgisin kórsetti. Báseke barysynda aıdyn ıeleri úsh ret alǵa shyqqanyna qaramastan astanalyqtar tarazy basyn teńestire aldy. Qorytyndy esep – 5:5. Jeńimpaz anyqtalmaǵan soń oıyn overtaımǵa ulasty. Qosymsha ýaqyt bastalǵan bette osy oıynda bes upaı jınaǵan N.Mıhaılıs mergendik tanytyp, «Barysqa» jeńis syılady. Qorytyndy esep – 5:6.
Endi elordalyq komanda óz muz aıdynynda eki mańyzdy kezdesý ótkizedi. 13 aqpanda Sankt-Peterbýrgtiń SKA-symen saıysqa tússe, 15 aqpanda Mınskiniń «Dınamosyn» qabyldaıdy.