Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń keńeıtilgen otyrysy boldy. Onda senatorlar «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdy qarady, dep habarlaıdy Egemen.kz Senattyń baspasóz qyzmetine silteme jasap.
Zańnyń negizgi maqsaty – jer týraly zańnamanyń jekelegen erejelerin buzǵany úshin ákimshilik jaýapkershilikti belgileý jáne jerdi paıdalaný men qorǵaýdy memlekettik baqylaýdy júzege asyratyn organdarǵa ákimshilik isterdi qaraý jáne tıisti jazalar qoldaný jónindegi ókilettik berý.
Zań osylaısha jerdi paıdalaný men qorǵaýdy memlekettik baqylaý jónindegi fýnksııalardy ákimdikterdiń quzyretinen alyp aýyl sharýashylyǵy mınıstrligine qaıtarady.
Sonymen qatar «Geodezııa, kartografııa jáne keńistiktik derekter týraly» Qazaqstan Respýblıkasynyń zańyna sáıkes keltirý úshin jáne geodezııalyq pýnktterdi saqtaý maqsatynda jergilikti atqarýshy organdarǵa tıisti ákimshilik isterdi qaraý jónindegi ókilettikter beriledi.
Zańmen engiziletin ózgerister maqsaty boıynsha paıdalanylmaıtyn ne zańnamany buza otyryp paıdalanylatyn aýyl sharýashylyǵy jerlerin, onyń ishinde mal jaıylymynyń tapshylyǵyn sezinip otyrǵan aýyl halqyna jaıylymdardy qaıtarý jónindegi Memleket basshysynyń tapsyrmasyn oryndaýdaǵy laýazymdy adamdardyń qyzmetine qarqyn beretin bolady.
Zańdy qaraý qorytyndysy boıynsha ony Palatanyń qaraýyna jiberý týraly sheshim qabyldandy.