QR Indýstrııa jáne ınfraqurylymdyq damý mınıstri Marat Qarabaev Máskeýge jasaǵan jumys saparynda kórshiles memlekettiń Qurylys jáne turǵyn úı-kommýnaldyq sharýashylyq jónindegi mınıstri Irek Faızýllınmen, RF Kólik mınıstri Vıtalıı Savelevpen jáne Reseı Federasııasynyń Energetıka mınıstri Nıkolaı Shýlgınovpen kezdesti. Jumys sapary barysynda Marat Kárimjanuly sondaı-aq RF Úkimet tóraǵasynyń orynbasary – RF О́nerkásip jáne saýda mınıstri Denıs Mantýrovpen de kezdesý ótkizedi dep josparlanyp otyr, dep habarlaıdy Egemen.kz.
Reseı Federasııasynyń Qurylys jáne turǵyn úı-kommýnaldyq sharýashylyq jónindegi mınıstri I.Faızýllınmen kezdesýde sáýlet, qala qurylysy jáne tutastaı qurylys salasyn damytý, sondaı-aq qurylysty sıfrlandyrý, ıpotekalyq nesıeleý jáne memlekettik saraptama salasyndaǵy yntymaqtastyq máseleleri qaraldy.
Ásirese Marat Qarabaev seısmıkaǵa tózimdi qurylys salasyndaǵy normalar men erejelerdi birizdendirýge erekshe toqtaldy. Mınıstrdiń aıtýynsha, osy yntymaqtastyqtyń aıasynda TMD ǵalymdary Ortalyq Azııanyń qurylys normalarynda seısmıkaǵa tózimdilik talaptaryn jetildirý boıynsha táýekel kartasyn ázirleýge arnalǵan zertteýlerdi júrgizip keledi. Bul zertteýdiń derekteri jer qyrtysyndaǵy jarylǵan jerlerdi anyqtap, tektonıkalyq qozǵalystar men Ortalyq Azııa elderi aýmaǵyndaǵy seısmıkalyq qaýipti aımaqtarynda esepteý júrgizip, osy aqparatty birlesip taldaý úshin paıdalanylmaq.
Sondaı-aq Reseıdiń astanasyna barǵan issaparynda vedomstvo basshysy Marat Qarabaev RF Kólik mınıstri Vıtalıı Savelevpen de kezdesti. Onyń barysynda Qazaqstan men Reseıdiń avtokólik salasyndaǵy yntymaqtastyǵyn damytý, sondaı-aq júk ári jolaýshylar avtotasymaly baǵytyndaǵy ekijaqty úkimetaralyq kelisim jobasyn daıyndaý máseleleri qaraldy.
Budan basqa sıfrly tahograftardy paıdalaný, eki memlekettiń shekarasyndaǵy ótkizý pýnktterin jańǵyrtý jáne «Soltústik-Ońtústik», «Batys Eýropa - Batys Qytaı» men «Merıdıan» kólik dálizderin damytý, sondaı-aq reseılik tasymaldaýshylardyń elimizdiń aýmaǵyna júkterdi qaıta tıeý arqyly tasymal jumystaryn úılestirý syndy máseleler qozǵaldy.
Sondaı-aq bul kúni QR IIDM basshysy Reseı Federasııasynyń Energetıka mınıstri Nıkolaı Shýlgınovpen kezdesti. Taraptar bıtým jetkizý máselelerin talqylap, energetıka salasyndaǵy yntymaqtastyq ekijaqty qatynastardyń negizgi baǵyttarynyń biri ekenin atap ótti.
Jumys sapary barysynda Marat Kárimjanuly RF Úkimet tóraǵasynyń orynbasary – RF О́nerkásip jáne saýda mınıstri Denıs Mantýrovpen de kezdesý ótkizedi. Qazir ónerkásip salasyndaǵy yntymaqtastyq eki el arasyndaǵy ekonomıkalyq baılanystyń negizgi baǵyty sanalatynyn aıta ketý kerek.