Bıylǵy Parlament jáne máslıhattar saılaýy burynǵy saıası naýqannan ózgeshe bolǵaly tur. Sol sebepten bolar, Atyraý oblysynda da saılaýǵa qatysýǵa nıet bildirgender qatary jeterlik. Tipti bul saılaýda jumyssyz júrgender de baq synap kórýge bekinipti.
Atyraý oblystyq aýmaqtyq saılaý komıssııasynyń aqparatyna súıensek, munaıly óńirden Parlament Májilisiniń depýtattyǵyna birmandattyq saılaý okrýginen 1, al ár deńgeıdegi 9 máslıhatqa 140 depýtat saılanady. Qazir saılaýǵa 496 kandıdat usynylǵan.
Saıası dodanyń kórigi Májilis depýtaty úshin talasta qyzatyny baıqalady. О́ıtkeni Atyraý oblysynan tómengi palata depýtatyn saılaý jónindegi №13 birmandattyq saılaý okrýgine 20 kandıdat usynylyp otyr. Onyń ishinde ózin-ózi usynǵan 16 kandıdat bar. Tórt kandıdat – «Amanat», «Aqjol», «Aýyl», JSDP partııalarynyń ókili. Al Májilis depýtattyǵynan kandıdattardyń basym bóligi basshylyq qyzmet atqaryp júr. Úmitin úrlep, saıası dodaǵa qatysýǵa bilek túrgenderdiń eki zeınetkerden ózgesiniń jasy negizinen 34 pen 60-tyń aralyǵyn quraıdy. Eń úlkeni – 76, eń kishisi – 34 jasta. Eki zeınetkerge qosa úsh jumyssyz, bir mehanık, bir maman bar. BAQ-tyń eki ókili de baq synamaqqa bekingen. Kandıdattardyń bireýi buryn Senattyń, taǵy bireýi Májilistiń depýtaty bolǵan. О́zin-ózi usynǵan burynǵy depýtattardyń ekeýiniń de mamandyǵy – zańger, qazirgi Ál-Farabı atyndaǵy QazUÝ-diń túlegi. Májilis depýtattyǵyna kandıdattyń biri – Atyraý qalasynyń burynǵy ákimi. Jasy jetpistiń jelkenin kergen eks-ákim de ózin-ózi usynyp otyr. Biraq zeınetker bolǵanymen, áli de sheteldik kompanııada basshynyń orynbasary laýazymyn atqarady.
Sondaı-aq oblystyq máslıhattyń depýtattaryna 30 oryn bólingen. Onyń ishinde teń jartysy majorıtarlyq júıemen, qalǵany partııalar usynǵan tizimmen saılanǵaly otyr. Atyraý qalalyq máslıhatynyń 25 depýtaty, 7 aýdandyq máslıhattyń 85 depýtaty tolyqtaı majorıtarlyq tásilmen saılanady. Oblystyq máslıhattyń 15 depýtatyn partııalyq tizimmen saılaý kózdelgen. Bul da saıası partııalar arasyndaǵy básekeni óristetetini daýsyz. Sondyqtan bolar, 6 saıası partııadan 15 mandat úshin usynylǵan kandıdattar sany – 68. Onyń ishinde «Amanat» partııasynan 31 kandıdat bar. Al «Aqjol» partııasy – 10, Qazaqstan halyq partııasy – 9, «Aýyl» partııasy 7 úmitkerin qosqan. Saıasat alańyna endi ǵana qadam basyp, belsendi jumys nátıjesin kórsete qoımasa da «Baıtaq jasyldar» men «Respublica» partııasy da bul dodadan qalys qalǵysy kelmegen. Aldyńǵysy partııalyq tizimmen – 6, sońǵysy 5 ókilin usynypty.
О́ńir bıýdjetin bekitetin máslıhat depýtattaryn saılaý jónindegi 15 birmandattyq aýmaqtyq saılaý okrýgine – 50, Atyraý qalalyq máslıhatyna – 84, Jylyoı aýdandyq máslıhatyna – 52, Inderde – 40, Isataıda – 34, Qurmanǵazyda – 42, Qyzylqoǵada – 37, Maqatta – 36, Mahambet aýdandyq máslıhatyna 33 kandıdat usynylyp otyr. Basshynyń portfelin ustaǵandar depýtat bolýdan úmittilerdiń qataryn tolyqtyrdy. Saılaýaldy báseke Maqat aýdanynda ózgeshe qarqyn alatynǵa uqsaıdy. Olaı deýimizge munda bir ujymnan bir-birimen básekeles bolýdy kózdegen ujymdastar kóp. Basshy men orynbasary, bólim jetekshisi laýazymymen bir ujymda jumys isteıtin áriptester bir saılaý okrýginde toqaılasqan. Soǵan qaraǵanda, olar «Biri – bári úshin, bári – biri úshin» deıtin qaǵıdany ustanatyn bolýy kerek. Sóıtip, bir mektepten úsh muǵalimniń, bir kásiporyndaǵy úsh munaıshy men aýrýhananyń úsh dárigeri arasynda qandaı ýaǵda bolǵany belgisiz, áıteýir, áriptester bir okrýgtegi saılaýshylardyń daýysyn ózara bólisýge talpynyp kórmek. Basshynyń bárin «Amanat» partııasy usynsa, olardyń básekelesteri ózderin úmitkerler sapynan kórgisi kelgen. Aıtpaqshy, munda aýdan ákiminiń orynbasary da saılaýshylardyń kóńil kiltin tabýǵa sheshim qabyldapty.
Atyraý oblysyndaǵy 9 máslıhattyń depýtattyǵyna kandıdattardyń arasynda ár salanyń ókili baryn aıtqan lázim. Sońǵy 10 jyldan beri úzbeı depýtat bolǵan, buryn mandatyn óz erkimen tapsyryp ketken úmitker de qaıtadan dodaǵa túspek. Ásirese bilim, medısına, mádenıet salasynyń ókilderi jeterlik. Muǵalim men dáriger, mehanık pen dánekerleýshi, aýdarmashy sekildi qarapaıym mamandyqtyń ıeleri de bar. Jumyssyz júrgender men zeınetkerler neken-saıaq. Jastardyń úlesi de az emes.
Aıta keter bir jaıt, kandıdattardyń túgelge jýyǵy – qazaq. Majorıtarlyq júıemen depýtat saılanatyn okrýgterdegi kandıdattar tobynan ózge etnostyń 5-6 ókiliniń ǵana aty-jóni kezdesti. Degenmen budan burynǵy saılaýlarda baıqalyp júrgendeı, kandıdattar tiziminde qarapaıym eńbek adamynan góri jumsaq oryntaqty jambasyna basqan basshylardyń sany ozyp tur. Bárin aıt ta, bir aıt, bul saılaýda alaqanyn ysqylap otyrǵan basshylar óte kóp. Báriniń oıy – depýtat bolý.
Atyraý oblysy