Q.Qýanyshbaev atyndaǵy memlekettik akademııalyq qazaq mýzykalyq drama teatrynda Astana qalasy Tilderdi damytý basqarmasynyń uıymdastyrýymen «Til óneri jáne tulǵa» atty is-shara ótti. Ondaǵy maqsat – kórnekti jazýshy, Memlekettik syılyqtyń laýreaty Sáken Júnisovtiń shyǵarmashylyǵyn nasıhattaý, qazaq mádenıetine, tili men ádebıetine degen jastardyń yqylasyn arttyrý.
«Japandaǵy jalǵyz úı», «Aqan seri», «Zamanaı men Amanaı» romandary, sondaı-aq, «Ajar men ajal», «Ár úıdiń erkesi», «Qysylǵannan qyz boldyq», «Jaraly gúlder», «Qyzym, saǵan aıtam», «Qos anar», «О́liara» dramalary arqyly qalyń qazaqqa tanymal bolǵan jazýshynyń shyǵarmashylyq jolyn, qol jetkizgen tabystaryn, mejelegen belesterin óskeleń urpaqqa ulyqtaýǵa arnalǵan is-sharany fılologııa ǵylymdarynyń doktory, professor, L.N.Gýmılev atyndaǵy Eýrazııa ulttyq ýnıversıtetiniń prorektory Dıhan Qamzabekuly júrgizdi. Teatr shańyraǵynda zııaly qaýym ókilderi, aqyn-jazýshylar, qoǵam qaıratkerleri daryn ıesi týraly estelikter aıtyp, onyń keler urpaqqa mura etip qaldyrǵan shyǵarmalary tóńireginde oı bólisti.
Halyqaralyq «Alash» ádebı syılyǵynyń laýreaty, aqyn Serik Turǵynbekuly ómir jolynyń qalamgermen toǵysqan tustarynda rýhanı dostyqtarynyń baýyrmaldyqqa ulasqanyn aıta kele, qalamgerdiń aqtyq demi taýsylǵansha ádemilikke qushtar bolǵanyn, ultjandy azamat, ór rýhty ójet bitimdi tulǵa ekendigin atap, «Saǵyndym Seri aǵany» atty jazýshyǵa arnalǵan óleńin oqyp berdi. Al sharanyń uıymdastyrylýyna muryndyq bolǵan Astana qalasy Tilderdi damytý basqarmasy «Rýhanııat» ortalyǵynyń dırektory Erbol Tileshov qalamgerdiń kózi tirisinde de joǵary dárejege ıe bolǵanyn aıta kelip, jazýshyǵa degen qurmet kúshiniń qazirgi tańda da álsiremegenin, sebebi, artynan ergen urpaqtary daryn ıesiniń esimin óltirmeı máńgige saqtap qalatynyna senimin bildirdi.
Is-sharanyń kelesi bir bóliginde Sáken Júnisovtiń «Qysylǵannan qyz boldyq» dramasy teatr ártisteriniń sahnalaýynda kórinis tapty. Akter Erbolat Jasulan, Esen Nursultan jáne Boranbaı Moldabaev komedııalyq rólderin sheber somdap, kórermenderdi ótken kúnniń muńly esteliginen aryltyp, qyran-topan kúlkige keneltti. Sondaı-aq, sharada Qaırat Baıbosynov, Erlan Rysqalı syndy elge tanymal ánshiler «Aqan seri-Aqtoty», «Raıhangúl», «Balqadısha», «Mańmańger», «Qulager» jáne basqa da syrly da sazdy ánderdi oryndap, jınalǵan qaýymǵa tamasha áser syılady.
Zııaly qaýym, BAQ ókilderi, soǵys jáne eńbek ardagerleri, til janashyrlary, joǵary jáne arnaýly orta oqý oryndarynyń oqytýshylary, stýdentter men mektep oqýshylary qatysqan ıgi sharada qalamgerdiń ómirine baılanysty rejısser Bolat Uzaqov túsirgen fılmnen úzindi kórsetilip, jazýshynyń kitaptarynan kórme uıymdastyryldy.
Nazym QAIRAT.
Astana.