Alǵys aıtý kúni Almaty oblysynda jańasha formatta keńinen atalyp ótpek. Ataýly datany merekeleý 20 aqpannan 1 naýryzǵa deıin jalǵasady, dep habarlaıdy Egemen.kz.
О́ńirlik kommýnıkasııalar qyzmeti alańynda ótken brıfıng barysynda Almaty oblysy Etnosaralyq qatynastardy damytý bólimi – Qazaqstan halqy Assambleıasy hatshylyǵynyń basshysy Jandar Asan josparlanyp otyrǵan is-sharalarǵa toqtaldy.
«Merekelik onkúndik 20 aqpanda «Alǵys aıtý kúniniń basty ıdeıasy ne?» taqyrybynda esse jazýdan mektep oqýshylary arasyndaǵy oblystyq baıqaýdan bastalady. Alǵash ret uıymdastyrylyp otyrǵan saıystyń maqsaty – jastar arasynda ataýly kúnniń mán-mańyzyn keńinen nasıhattaý, óskeleń urpaqqa merekeniń ıdeologııalyq qundylyǵyn jetkizý», dedi Jandar Asan.
Al «Almaty region PUBLIC LECTURE» atty sıkldy dárister serııasynyń basty maqsaty – óskeleń urpaqty meıirimdi bolýǵa, adamı qasıetterdi saqtaýǵa, ultjandylyqqa úndeý. Is-shara aıasynda belgili tulǵalar, túrli salada jetistikke jetken azamattar, Qazaqstan halqy Assambleıasynyń músheleri birlik, qoǵamdyq kelisim, qazaqstandyq patrıotızm taqyryptary sheńberinde óńir jastarymen taǵylymdy oılaryn bólispek.
Merekelik is-sharalar sheńberinde Almaty oblystyq Qazaqstan halqy Assambleıasy janyndaǵy etnomádenı birlestikterdiń uıytqy bolýymen «Júrekten – júrekke» qaıyrymdylyq aksııasy da ótpek.
Al «Búgingi kúnniń batyrlary» jobasynyń basty maqsaty – túrli salalarda adal eńbek etip júrgen azamattardy jan-jaqty dáripteý.
«Alǵys aıtý merekelik on kúndigi aıasyndaǵy negizgi is-sharalar 1 naýryzda oblys ortalyǵy – Qonaev qalasynda uıymdastyrylady. «Raqmet saǵan, Qazaqstan!» jalpy ataýymen ótetin is-sharalar «Bir ult. Bir maqsat. Bir qundylyq» etnostardyń mádenıet kórmesimen ashylady. Toleranttylyqtyń aıqyn kórinisi retinde aıshyqtalatyn etnostardyń mádenıet kórmesi sheńberinde óńirdegi 10 etnomádenı birlestik ózderiniń ulttyq salt-dástúri men mádenıetinen syr shertetin jádigerlerdi kópshilik nazaryna usynbaq», dedi spıker.
Merekelik is-sharalar aıasynda «The Spirit of Ethnos» ataýymen mádenı festıvali de uıymdastyrylmaq. Sonymen qatar óńirdiń órkendeýi jolyndaǵy qajyrly qyzmeti men ultaralyq tatýlyqty dáripteýge sińirgen ólsheýsiz eńbegi úshin birqatar azamat Almaty oblysy ákiminiń «Alǵys hatymen» marapattalady.