Túrkistan oblysynda 30 keliden astam esirtkini Reseıge tasymaldamaq bolǵan sheteldik jaýapkershilikke tartyldy. Bul týraly oblystyq sottyń baspasóz qyzmeti habarlady, dep jazady Egemen.kz.
Vedomstvonyń málimetinshe, sottalýshy óziniń «Ford Mondeo» avtokóligimen Tájikstannan Qazaqstan shekarasy arqyly Reseıge asa iri kólemde esirtki zatyn alyp ótpek bolǵan. Er adam «Jibek joly» baqylaý-ótkizý beketinde ustaldy. Avtokólikti tekserý barysynda shekaralyq baqylaý kınology men Belka esimdi qyzmettik ıt janar-jaǵarmaı sısternasynan jalpy salmaǵy 31 keli 465,2 gramm geroın tapty.
«Túrkistan oblysynyń qylmystyq ister jónindegi mamandandyrylǵan aýdanaralyq soty QR QK-niń 24-babynyń 3-bóligi, 286-babynyń 4-bóligi, 297-babynyń 3-bóligimen kózdelgen qylmysty jasady dep aıyptalǵan Sh. esimdi azamatqa qatysty qylmystyq isti qarady. Sottalýshy Sh. 2022 jylǵy 22 shildede saǵat 18:00-de óziniń avtokóligimen О́zbekstan Respýblıkasynyń «Gısht-kóprık» memlekettik shekara baqylaý beketi shekarasynan ótip, «Jibek joly» baqylaý-ótkizý pýnktinde toqtaǵan. Sh.-nyń qylmystyq áreketteri is materıaldarymen dáleldendi», dep habarlady oblystyq sottyń baspasóz qyzmeti.
Qadaǵalaý organynyń málimetinshe prokýror sottalýshyǵa 18 jylǵa bas bostandyǵynan aıyrýdy suraǵan. Sheteldik azamat sotta óz kinásin jartylaı moıyndap, jeńil jaza taǵaıyndaýdy surady.
«Jasalǵan is-áreketterdiń qoǵamdyq qaýiptiligin eskere otyryp, sottalýshy Sh. 15 jylǵa bas bostandyǵynan aıyryldy., ol óz jazasyn QK kúsheıtilgen mekemelerde óteıdi. Sot úkimimen sottalýshy joǵaryda atalǵan qylmystyq quqyq buzýshylyqtardy jasaǵany úshin kináli dep tanyldy. Úkim zańdy kúshine engen joq», dep tolyqtyrdy vedomstvodan.