Alǵys aıtý kúni qarsańynda Erkeǵalı Rahmadıev atyndaǵy Memlekettik akademııalyq fılarmonııada «Áıel jáne óner» taqyrybynda dóńgelek ústel ótti.
Alqaly jıynǵa E.Rahmadıev atyndaǵy MAF kórkemdik jetekshisi Gúlmıra Quttybadamova, Ulttyq delfıı komıtetiniń dırektory Quralaı Túspekova, sýretshi, kýrator, galerıst Leıla Mahat, fılarmonııanyń bas redaktory Zarına Muhamedáli, shyǵarmashylyq ujym jetekshileri Araılym Rahym, Roza Shotqalıeva, sondaı-aq Aıgúl Qosanova, Janar Júsipova, Saıda Qalyqova, Altynshash Muqataeva syndy óner maıtalmandary qatysty.
Kezdesý barysynda elimizdiń mádenıeti men ónerin damytýdaǵy áıelderdiń róli týraly baıandamalar oqylyp, pikir almasty. Dóńgelek ústel áıelderdiń shyǵarmashylyq bastamasynyń sımvolyna aınalatyn, qatysýshylardy biriktirip, olardy «Ana jaýlyǵy» atty halyqaralyq mádenı-tanymdyq jobanyń bir bóligine aınaldyratyn perfomansty qamtıdy.
Aıta keteıik, sýretshi Leıla Mahat álemdi karantın sharpyǵan kezde «Ana jaýlyǵy» halyqaralyq jobasyna bastamashy bolǵan edi. Búgin de bul ıdeıa ózektiligin joǵaltqan joq.
«Ár mádenıettiń ulttyq kıimi bar, ár ulttyq kıimde kostıým elementi jáne áıel, ana bolýdyń sımvoly – oramal bolady. «Aq oramal – qazaq halqy salt-dástúriniń kıeli atrıbýty. Aq tús ana sútin, tazalyqty, ádeptilikti bildiretin qasıetti maǵynaǵa ıe. Kóptegen qazaq otbasynda mura bolyp qalǵan kımeshek jádiger retinde saqtalady», deıdi Leıla Mahat.