Saılaý kúni jaqyndaǵan saıyn kandıdattardyń da, halyqtyń da belsendiligi artty. Úmitkerler úgit pen úmittiń ortasynda júrse, daýys berýshiler «kimge daýys bergen jón?» degen oıdyń jeteginde júr. Saıası doda qyzǵan shaqta teledebattarda sóz talastyrǵan partııa ókilderi ár daýys úshin kúresetinin dáleldep baqty.
Keshe «Habar» telearnasynyń tikeleı efırinde kezekti pikirsaıys uıymdastyryldy. Oǵan «Amanat» partııasynan Erlan Qoshanov, «Aýyl» halyqtyq demokratııalyq patrıottyq partııasynan Jıgýlı Daırabaev, «Respublica» partııasynan Aıdarbek Qojanazarov, Qazaqstan halyq partııasynan Oksana Áýbákirova, Qazaqstannyń «Baıtaq» jasyldar partııasynan Azamathan Ámirtaev, «Aq jol» Qazaqstan demokratııalyq partııasynan Azat Perýashev jáne Jalpyulttyq sosıal-demokratııalyq partııasynan Nurlan Áýesbaev qatysyp, tyń oılaryn ortaǵa saldy.
Alǵashqy kezeńniń alǵashqy týrynda spıkerler partııanyń maqsatymen tanystyrdy. Alǵash bolyp sóz alǵan «Baıtaq» partııasynyń tóraǵasy Azamathan Ámirtaev: «Biz aınalamyzǵa qorshaǵan ortany qorǵaýǵa beıjaı qaramaıtyn azamattardy toptastyrdyq. Eldegi ekologııalyq problemalarmen qatar, halyqtyń tabysyn arttyrý men áleýmettik máselelerdi sheshýge basymdyq berip otyrmyz», dedi ol.
«Respublica» partııasynyń tóraǵasy Aıdarbek Qojanazarov partııa basshylary eńbek adamdary ekenin, eńbek jolyn qarapaıym jumysker bolyp bastap, úlken jetistikke jetkenin, jınaqtaǵan mol tájirıbelerin halyqtyń ál-aýqatyn jaqsartýǵa jumsaýǵa daıyn ekenin jetkizdi.
Qazaqstan halyq partııasynyń ókili Oksana Áýbákirova senim adamdy alǵa jeteleıtin kúsh ekenin aıtyp, partııa ókilderi halyqtyń senimine selkeý túsirmeýge tyrysatynyn aıtty.
«Aýyl» partııasynyń ókili Jıgýlı Daırabaev «aýyldyqtar» jumystaryn sózben emes, ispen dáleldeıtinin, Qazaqstandy qýatty elge aınaldyrýǵa kúsh jumsaıtynyn alǵa tartty.
«Aq jol» partııasynyń tóraǵasy Azat Perýashev ýádeni úıip tókpeı, naqty istermen aınalysyp jatqanyn aatap ótti. Osy ýaqytqa deıin partııa ókilderi tabandylyqpen usynyp kelgen bastamalar júzege asa bastaǵanyn jetkizdi.
Jalpyulttyq sosıal-demokratııalyq partııasynyń ókili Nurlan Áýesbaev jemqorlyqpen kúresip, sheteldegi qarajatty elge qaıtarýǵa atsalysyp, turǵyndardyń turmysyn arttyrýǵa kúsh salatyndaryn aıtty.
«Amanat» partııasynyń tóraǵasy Erlan Qoshanov partııa halyqtyń ál-aýqatyn jaqsartý maqsatynda barlyq salada tyń reformalardy júzege asyrýǵa daıyn ekenin jetkizdi.
Alǵashqy kezeńniń ekinshi týrynda spıkerler bir-birine saýal joldap, pikirsaıysty qyzdyra tústi. Eshkim tosylyp qalǵan joq. Berilgen ýaqytty tıimdi paıdalanyp, emosııaǵa berilmeı, jan-jaqty jaýap berýge tyrysty. Saýaldardyń deni partııalardyń jumysyna qatysty qoıyldy. Atap aıtsaq, qorǵanys, kásipkerlik, ekologııa sııaqty mańyzdy máseleler kóterilip, halyq batyl bastamalardy kútip otyrǵany aıtyldy.
Ekinshi kezeńniń alǵashqy týrynda spıkerler elimizdiń áleýmettik-ekonomıkalyq damýyna qatysty usynystaryn ortaǵa saldy. A.Ámirtaev jol, jylý, turǵyn úı máselesin kóterip, qorshaǵan ortany qorǵaýdy nazarda ustaý kerek ekenin aıtty. J.Daırabaev azyq-túlik qaýipsizdigi máselesin kóterse, A.Perýashev salyq salasyndaǵy reformalardy jańǵyrtýdy usyndy. A.Qojanazarov kásipkerlikti damytýǵa kóńil bólse, N.Áýesbaev jemqorlyqpen kúresti kúsheıtý kerek ekenin aıtty. O.Áýbákirova saıası júıeni jańǵyrtýdy seń qozǵalǵanyn aıtyp, bul baǵyttaǵy jumystardyń jalǵasýy mańyzdy ekenin jetkizdi. E.Qoshanov jumyssyzdyq máselesin sheshýge, ózge de áleýmettik máseleni sheshýge atsalysatyndaryna sendirdi.
Ekinshi kezeńniń ekinshi týrynda spıkerler turǵyndardan túsken saýaldarǵa jaýap berdi. Saılaýshylar kóbine áleýmettik máselelerdi kóterip, partııalar ony sheshý úshin qandaı naqty jumystar atqaratynyn surady.
Túıin: Osylaısha, aldaǵy saıası naýqan aıasynda Ortalyq saılaý komıssııasynyń tapsyrysy boıynsha úshinshi teledebat tartysty ótti deýge negiz bar. Tikeleı efırde tosynnan qoıylǵan suraqqa jaýap berip, oıyńdy jınaqtap sóz sóıleý ońaı emes. Bul rette partııa ókilderi shama-sharqynsha saılaýaldy baǵdarlamalarynyń basym baǵyttaryn tilge tıek etip, saılaýshylardyń senimin aqtaýǵa tyrysatyndaryn dáleldep baqty. Endigi kezek – saılaýshylarda!